کوئٹہ۔ 19 اپریل (اے پی پی) سیکرٹری گوازی بلوچستان محمد اسحاق جمالی پارینے کہ ورناتے روچہ نا تُو اٹی جان جوڑ سرجز فراوان کننگ کن روچہ اسپورٹس فیسٹیول اس اڈتننگا ہراٹی ہاکی ، بیڈمنٹن ، باسکٹ بال تون اوار ہشت آن زیات گوازی تا مقابلہ کوئٹہ ٹی اڈتننگا۔ داخیال آتا درشانی ءِ او محکمہ گوازی حکومت بلوچستان نا کنڈآن پروجیکٹ پاکستان نا رداٹ روچہ مبارک اسپورٹس فیسٹیول اٹی ہاکی لیگ انا ایسری آ دود آن تران کرسا کرے۔ دود اٹی ڈائریکٹر جنرل گوازی دُرا بلوچ ، بلوچستان ہاکی ایسوسی ایشن نا صدر امجد ستی، جنرل سیکرٹری سید امین ، کوئٹہ ڈسٹرکٹ ہاکی ایسوسی ایشن نا صدر کامران صابر، آفتاب ایوب جمالی، آصف دشتی ، شرافت بٹ، حبیب اللہ کاکڑ ، اعجاز انجم حیدر، بختیار خان رئیسانی و ایلوفک بشخ ہلکر سیکرٹری گوازی پارے کہ ڈائریکٹر جنرل گوازی نا منت واری ءِ ہرفیوہ ہرا روچہ اسپورٹس فیسٹیول کرفنگ نا سلاہ تس و داسہ دا فیسٹیول سرسہبی اتون ایسری نا کنڈآ گامزن ءِ دا فیسٹیول اٹی اونا اہم ءُ کڑد اس مسنے ، اوپارے کہ ورناتے مثبت سرجزآتا کنڈآ اتنگ و تینا لائخی تے نشان تننگ کن وارخواہی فراوان کننگ انگ ءِ ننا صوبہ ٹی ٹیلنٹ نا ہچ ءُ کمتی اس اف ولے ٹیلنٹ ءِ مون آ اتنگ کن ورناچین ءِ وارخواہی فراوان کننگ بے کچ المی ءِ۔ او فیسٹیول اٹی بشخ ہلوک آ غٹ گوازی گر، میڈیا و ایونٹ نا سرسہب اڈتننگ آ منتظمین آتا ہم خصوصی وڑاٹ منت واری ءِ ہرفے، داکان مست بلوچستان پولیس ہاکی ٹیم و برنی ہاکی کلب نا نیام اٹ سنسنی خیز فائنل میچ اس مس تخوک آ وخت اسکان میچ اسٹ اسٹ تون بریبر ئسک اوکان پد میچ انا فیصلہ پنالٹی شوٹر آؤٹس آ مس۔ پنالٹی شوٹز آؤٹس آ بلوچستان پولیس ٹیم 4 وخت اس کہ برنی ہاکی کلب 3 گول اسکور کرے و ہنداوڑ دا میچ ءِ بلوچستان پولیس ہاکی ٹیم کٹسا چیمپین جوڑ مننگ نا شرف ءِ تینا پن آ کرے میچ انا ایسر آ مہمان خاص گوازی گر و آفیشل آتیٹی انعام و شیلڈ بشخا۔
