اسلام آباد۔ 21مئی (اے پی پی) وزیراعظم محمدنواز شریف یک شنبے نا دے مسہ دے ئی دورہ غا سعودی عرب آ رادہ مس ہراڑے او ریاض اٹی اولیکو امریکہ عرب اسلامی سہ کڑدہ ہی کانفرنس اٹی شرکت کیک۔ وزیراعظم سعودی عرب نافرمانرواشاہ سلمان بن عبدالعزیز السعود نا سلہ غا دیوان اٹی شرکت کننگ ئِ۔ سلاہکار خارجہ سرتاج عزیز و خاتون اول بیگم کلثوم نواز ہم اوڑتون اوار ئُ۔ امریکہ عرب اسلامی کانفرنس اٹی سعودی عرب نا فرمانرواشاہ سلمان بن عبدالعزیز و امریکہ نا صدر ڈونلڈ ٹرمپ آن بیدس 55ملک آتا سروکِ مملکت و حکومت ئِ شرکت نا سلہ خلنگانے۔ ریاض اٹی مروک آ دا کانفرنس نا کمک اٹ جہانی راہشون آتے دنیا آن دہشت گردی و انتہاپسندی نا چٹفنگ کن چندی وڑوڈول آتیا سجفنگ نا موقع ملک۔ اومیت ئِ کہ دا کانفرنس نا کمک اٹ دہشت گردی ئِ خاص ئُ مذہب، دودوربیدہ ، تہذیب یا علاقہ سے تون گنڈنگ نا رجحان ئِ چٹفنگ مرے۔ کانفرنس آن تران اٹی وزیراعظم محمد نواز شریف اسلام نا امن، سگ و سیوت ناکلہو ئِ تالان کیک۔ وزیراعظم کانفرنس آن تران اٹی ڈیہہ ٹی دہشت گردی و انتہاءپسندی نا لعنت ئِ شکست تننگ اٹی پاکستان ناسرسہبی و پاکستان نا عظیم قربانی تے مون آ تخک۔ تینا دورہ ٹی وزیراعظم انسداد دہشت گردی و بنداو پرستی نا سعودی بنجاءنا بنائی دود اٹی ہم ایلو راہشون آتون اوار شرکت کیک۔
