کوئٹہ۔ 19 اپریل (اے پی پی) چیئرمین اسٹینڈنگ کمیٹی پیٹرولیم و ریسورسز سینیٹر عبدالقادر پارینے کہ پلوامہ نا بابت مقبوضہ کشمیر نا مسکوہی گورنر ستیا پال ملک ہرا ہوشربا پت آتے پاش کرینے اوفتیان پاکستان نا بے گناہی و مودی نا پاکستان نا برخلاف سازش پک مریک، ستیا پال بھارتی فاشٹ حکمران نریندر مودی آ پاش آن پا ش دوبہ خلسا پارینے کہ بی جے پی نا طرز حکمرانی ڈیہہ نا امن کن خطرہ ءِ۔ داڑے جاری مروک اسہ بیان اسے ٹی سینیٹر عبدالقادر پارے کہ ستیاپال ملک نا مودی آ دوبہ اصل اٹ دوبہ ہی آخا پاکستان نا بے گناہی نا شاہدی ءِ،پاکستان اسہ پرامن ءُ ملک اسے و تینا ہمسایہ غاتون بریبر مثبت تعلقداری نا مون آ دننگ آ یخین تخک پلوامہ نا واقعہ بھارتی حکمران تا کشمیر اٹی کروک آ ظلم انا ردعمل مننگ کیک۔ اوپارے کہ مقبوضہ کشمیر نا باسی بھارتی کوزہ نا چٹفنگ کن جہد ءِ برجاتخانو۔ اوپارے کہ پاکستان وخت اس ہم بھارت اٹی جتائی پسند حالیت آتے تہو تتنے ، بھارت نا تہہ نا جتائی پسند حالیت آتا سوب آن ملک انا طول و عرض اٹی جاگہ جاگہ غا امن و ایمنی نا حالیت ودی مرسا کیک پاکستان نا برخلاف ہروڑنا بھارتی رویہ نا بابت اوپارے کہ سانحہ ءِ کولکتہ مرے یا سانحہ پلوامہ دا بھارتی حکمران تا منفی سیاست و پالیسی تا شاخسانہ ءِ۔ اوپارے کہ بی جے پی خار، تعصب و بشخنگ نا سیاست آ یخین تخک، مودی نا سیاست ہندا سیاسی فلسفہ نا ڈیک ءِ ایتک۔ اوپارے کہ ہراتم کہ بھارتی سیاست دان تے گچین کاری نا بابت عمل نا میدان اٹ دڑنگوئی مریک او پاکستان مخالف خار تس بیانیہ درستی راستی کرفرہ۔ اوپارے کہ ہندا خار ہڑتوم آ ایٹمی واکدار آتے کیہی وار بھسکاری نا دنگ آایس سرکرے ستیاپال نا دوبہ غاک اصل اٹ بھارت ناخار تس سیاست نا دروشم ءِ نشان ایترہ۔
