راولپنڈی۔18اپریل (اے پی پی): مزن وزیر محمد شہباز شریف ءَ گشتگ کہ پیسرگیں حکومتءَ دومی منصوبہ آنی وڑءَ نادراہ جاہ آناں ہم ڈلگ چار کتگ، اُلسی ازمت، وانگء ُزانگ ء ُ جانء ُ سلامتی ءِ پڑآں سیاست کنگ مابیت، انسانیت ءِ ازمت ء ُ نادراہ آناں علاج ءِ آسراتی دئیگ درستاں چہ مستریں عبابت اِت، ما درستاناں یکجاہ بوہگ نیزگاری، نادراہی ءِ ہلاسی ء ُ ملک ءَ را قائد ء ُ اقبال ءِ پاکستان جوڑ کنگ ءِ ھاترءَ یکجاہ بوہگ لوٹ ایت۔ اے ھیالانی درشانی آئی ءَ سئے شمبےءِ روچءَ راولپنڈی انسٹی ٹیوٹ آف یورالوجی اینڈ ٹرانپلانٹیشن ءِ بُنگیج ءَ پد گپء ُ تران کنان ءَ کتگ۔ اے موہءَ بنجاہی وزیر مریم اورنگزیب ، راجی اسمبلی ءِ پیسرگیں باسک حنیف عباسی، ملک ابرار، حاجی پرویز خان، راجی اسمبلی ءِ باسک طاہرہ اورنگزیب ، روالپنڈی ءِ پیسرگیں میئر سردار نسیم خان، ضیاءاللہ شاہ،راجہ محمد حنیف ،راحت مسعود قدوسی، جانء ُ سلامتی ءِ سرپانک صوبائی وزیر ڈاکٹر جمال ناصر ء ُ راولپنڈی میڈیکل یونیورسٹی ءِ وائس چانسلر ڈاکٹر عمر، جان ء ُ سلامتی ءِ صوبائی سیکرٹری ڈاکٹر احمد جاوید قاضی ء ُ ایندگہ افسر ساڑی بوتگ اَنت۔ مزن وزیر ءَ گشتگ کہ اے نادراہ جاہ ءِ بنیات 2009 ءَ ایر کنگ بوتگ، 2013 ءَ پد ما ایشیءِ ھاترءَ فنڈ داتگ، تاں انوں کساس 15 ارب کلدار حرچ بوتگ اَتن، اے نادراہ جاہ ءَ را دکھی انسانیتءِ علاج ءِ ھاترءَ وتی کردءَ پیلو کنگ لوٹ ایتگ اَنت بلے پیسرگیں حکومتءَ ایندگہ منصوبہ آنی وڑءَ اے نادراہ جاہ ءَ را ہم ڈلگ چار کتگ، بلے کورونا ءِ وہدءَ اے نادراہ جاہ ءَبے مٹیں ازمت داتگ، اِدءَ وینٹی لیٹر است بوتگ ء ُ کورونا ءِ علاج ءِ بنجاہی بوتگ، ہمے وڑءَ لاہورءَ پاکستان کڈنی اینڈ لیور ٹرانسپلانٹ انسٹی ٹیوٹ( پی کے ایل آئی) ءَ ہم جگر ء ُ گُہٹگ ءِ مان دیئگ ءِ بازیں نادراہ آنی علاج ءِ بندوبست کنگ بوتگ بلے پیسرگیں چیف جسٹس ثاقب نثار ءَ منی سرءَ 20 ارب کلدار زوال کنگءِ بھتان جتگ، آئیءَ شمبے ء ُ یک شمبے ءَ ہم آمید گس پچ کُتگ اَنت، راج ءَرا حال دیئگ نابوتگ کہ اے پیسہ چون ورگ بوتگ اَنت؟ مزن وزیر ءَ گشتگ کہ اگاں اے 20 ارب کلدارغرق بوتگ اَنت گڑا کورونا ءَ پی کے ایل آئی کورونا ءِ نادراہ آنی علاج ءِ ھاترءَ یک مزنیں بُنجاہے چوں جوڑ بوت؟ اِدءَ 200 وینٹی لیٹز مشین اَست ء ُ اے انسٹی ٹیوٹ ءَ چہ کورونا ءِ نادراہ شپ ء ُروچ وش بوہان اَنت۔ نامداریں ڈاکٹر سعید اختر امریکہ ءَ چہ منی گشگ ءِ پدءَ لکھاں ڈالر پگار یل کتگء ُ نادراہی آنی ازمت کنگءِ ھاترءَ پاکستان ءَ اَتکگ، من آئیءَ را گشتگک کہ گُہٹگ ءَ ہوار جگر ءِ مان دیئگ ءِ نادراہی جاہ ءِ بندوبست کنگ بہ بیت۔ مزن وزیر ءَ گشتگ کہ پی کے ایل آئی ءَ چاریں صوبہ، گلگت بلتستان ء ُ آزاد کشمیر ءِ نادراہ آناں ہم مفت مان دیئگ ( پیوندکاری) ءِ آسراتی دیئگ بوتگ، پی کے ایل آئی ءِ تہا کارکنوکیں ہیپاٹائٹس ءِ علاج ءِ بنجاہی ءَ دور کنگء ُ پیسرگیں حکومت ءَ ایندگہ نادراہ آنی گوما ہم دپ کتگ۔ مزن وزیر ءَ گشتگ کہ بیا اِت یکجاہ بئے ء ُ ملک ءَ را قائدء ُ اقبال ءِ پاکستان جوڑ کنگءِھاترء َ یکجاہ بں ء ُ نیزگاری، جہلات، بے روزگاری ء ُنادرائی آں ہلاس کناں۔
