راولپنڈی۔ 18 اپریل (اے پی پی) وزیراعظم محمد شہباز شریف پارینے کہ مسکوہی حکومت ایلوڈٹ آتیانبار ہسپتال آتے ہم گوجالوک تخا، السی خذمت، تعلیم و جان جوڑی نا بشخ آتیٹی سیاست بایدے مف، انسانیت نا خذمت و ناجوڑ آتے درمان نا آسراتی تننگ بھاز بھلو عبادت اسے، نن غٹ اواری اٹ نیزگاری ، جہالت، بے روزگاری ، ناجوڑی نا چٹفنگ و ملک ءِ قائد و اقبال نا پاکستان اس جوڑ کننگ کن بایدے یکجا مرین۔ داخیال آتا درشانی ءِ او سے شنبے نادے آ داڑے راولپنڈی انسٹی ٹیوٹ آف یورالوجی اینڈ ٹرانپلانٹیشن نا بناءِ کننگ آن پد گپ وتران کرسا کرے۔ داوخت آ بنجائی وزیر حوالکاری و شینکاری مریم اورنگزیب ، مسکوہی قومی اسمبلی نا باسک حنیف عباسی، ملک ابرار، حاجی پرویز خان، قومی اسمبلی نا باسک طاہرہ اورنگزیب ، مسکوہی میئر راولپنڈی سردار نسیم خان ، ضیاء اللہ شاہ، راجہ محمد حنیف، راحت مسعود قدوسی ، نگران صوبائی وزیر جان جوڑی ڈاکٹر جمال ناصر و راولپنڈی میڈیکل یونیورسٹی نا وائس چانسلر ڈاکٹر عمر، صوبائی سیکرٹری جان جوڑی ڈاکٹر احمد جاوید قاضی و ایلو تعلقدار آفیسر آک ساڑی ئسر۔ وزیراعظم پارے کہ او یورالوجی انسٹیٹیوٹ نا معائنہ ءِ کرینے و داہیت اناخوشی ءِ کہ داکان مہالو ناریسہ ٹی اینو آن باقاعدہ وڑاٹ ناجوڑآتا درمان نا بنامننگ ءِ، داڑے تروک آ آسراتی تیان است جم اُٹ، روچہ مبارک نا مقدس تُو اٹی ناجوڑ آتے درمان تننگ اسہ بھاز بھلو عبادت اسے، دا ہسپتال نا بنداو 2009 ء ٹی تخنگاسس، 2013ء آن پد نن داڑکن فنڈتسن، داتم اسکان کم و ود 5 ارب روپئی خڑچ مسنے، داہسپتال ڈکھیائی انسانیت نادرمان کن تینا کڑد ءِ بایدے ادا کروسس، ولے مسکوہی حکومت ایلو ڈٹ آتیانبار دا ہسپتال ءِ ہم گوجالا ولے کورونا ٹی دا ہسپتال بے پناہ خذمت سرتس انتئے کہ داڑے ماڑی و وینٹی لیٹر ز ساڑی ئسر، و کورونا نا درمان نا دااہم ءُ مرکز اس رہینگا، ہندا وڑ لاہور اٹی پاکستان کڈنی اینڈ لیورٹرانسپلانٹ انسٹی ٹیوٹ (پی کے ایل آئی ) ٹی ہم جغر و بِک آتا پیوندکاری نا سد آ ناجوڑ آتا درمان نا بست وبند کننگا ولے مسکوہی چیف جسٹس ثاقب نثار کنے آ دا باندات اٹی 20 ارب روپئی زیان کننگ نا دوبہ خلک، اوتو ہفتہ و یک شنبے تیاہم عدالت آتے خلککہ، قوم ءِ انت اکن پاتو کہ دا پیسہ غاتے امر ہڑت کننگا؟ وزیراعظم پارے کہ اگہ دا 20 ارب روپئی غرق مسوسر تو ولدا کورونا ٹی پی کے ایل آئی کورونا نا ناجوڑ آتا درمان کن اسہ بھلو مرکز اس امر جوڑ مسوسس؟ ہموڑے 200 وینٹی لیٹر مشینک ساڑی ئسر و دا انسٹی ٹیوٹ آن کورونا ناناجوڑآک دے و نن دراخ جوڑ مسرہ۔ اوپارے کہ نن پی کےایل آئی ءِ تینا نت تیا سلفنگ نا کوشست کننگ اُن۔ ممتاز معالج ڈاکٹر سعید اختر امریکہ غان کنا پاننگ آ لکھ آ ڈالر تنخواہ ءِ ہلساناجوڑ آتا خذمت کن پاکستان آ بسوسس و ای اودے پاریسٹ کہ بِک آتون اوار اوار جغر نا پیوندکاری نا ہم ہسپتا ل اٹ بایدے بست وبند مرے۔ داکان مست پنجاب حکومت ارب آ روپئی خڑچ کرسا بِک و جغر نا ناجوڑآتے درمان کن ہندوستان و چین آ گدریفیکہ۔ وزیراعظم پارے کہ پی کے ایل آئی ٹی ہرچار آصوبہ، گلگت بلتستان و آزاد کشمیر نا ناجوڑ آتے ہم مفت پیوندکاری نا آسراتی تننگا، پی کے ایل آئی نا چھتری ناکیرغ آن کاریم کروک آ ہیپاٹائٹس نا درمان نا سینٹرآتے ہم داڑان اینک کرسا مسکوہی حکومت ایلو ہسپتال آتون منسلک کریسس۔ اوپارے کہ مسلم لیگ (ن) نا قائد و مسکوہی وزیراعظم محمد نواز شریف نا کماشی ٹی مچ آ صوبہ نا ہسپتال آتیٹی پوسکن آ آسراتی تے فراوان کننگا، اٹک ، جہلم ، راولپنڈی و لیہ تون اوار چندی شار تیٹی پوسکن ءُ لیبارٹری جوڑ کننگا۔ وزیراعظم پارے کہ السی خذمت نا پڑاٹ سیاست شجر ممنوعہ بایدے مرے، ہراکہ حکومت برے کا کائے جان جوڑی و تعلیم نا بشخ اٹ بایدے سیاست مف۔ اوپارے کہ ببو اواری اٹ ملک ءِ قائد و اقبال نا پاکستان جوڑ کننگ کن یکجا مرین و نیزگاری، جہالت ، بے روزگاری و ناجوڑآتے چٹفن۔
