الس ئِ تینا حق انا دوئی کننگ کن ایلوتیا انحصار آن بیدس تینا تہٹی خو د اعتمادی بایدے ودی کیر
کراچی۔ 21مئی (اے پی پی) صدر مملکت ممنون حسین پارینے کہ الس ئِ تینا حق انا دوئی کننگ کن ایلوتیا انحصار کننگ آن بیدس تینا تہٹی خود اعتمادی بایدے ودی کیر، ہنداوڑ راج و ریاست نا کنڈآن عائد مروک آ زمواری تا ادائیگی ٹی ہم ہچ ئُ ڈیوالائی اس بایدے کننگپ۔ صدر مملکت داہیت ئِ یک شنبے نا دے زند اناچندی بشخ آتیان تعلق تخوک آ ڈل آتون ہیت وگپ کرساپارے۔ ڈل آتیٹی کانود دان، چاہندار تعلیم، و دانشورآتون اوار راج انا نمائندہ بندغ آک اوار ئسر۔ صدر مملکت پارے کہ قومی شونداری ئِ حقی بنداو تعلیم فراوان کیک۔ ہنداخاطران المی ئِ کہ تعلیمی ادارہ غاتیٹی معیاری نظم وضبط قائم مرے و تعلیم نا معاملہ ٹی تساہل آن بایدے کاریم ہلنگپ۔ صدر مملکت پارے کہ پاک چین اقتصادی راہداری و ون بیلٹ ون روڈ ڈٹ پاکستان کن اللہ نا خاص ئُ عنایت اسے ہراڑآن پبی وڑاٹ فائدہ ہرفنگ کن المی ئِ کہ ننا ورناک غٹ المی و جدید علوم و فنون اٹی گچین مہارت دوئی کیر۔ داچرجوئی ٹی تعلیمی ادارہ غاتا کڑد بھاز اہم ئِ۔ صدر پارے کہ تعلیمی معاملہ غاتیٹی او تینٹ بھاز است خواہی ہلیک و تعلیمی ویل آتا ایسری کن ایوان صدر نادرگہ ہروخت ملوک ئِ۔ صدر مملکت پارے کہ راجی ڈسپلن نا اڈتننگ اٹی عدلیہ نا کڑد بے کچ اہم ئِ و ننا عدالت آک دا چرجوئی ٹی قابل قدر کڑد ادا کرینو۔ اوپارے کہ تعلیمی ادارہ غاتیٹی بدعنوانی ئِ مون آ دروک آ عنصر آتون سختی اٹ مون تننگ نا گرج ئِ ، دا معاملہ ٹی راج انا ہر بندغ آ بھلو زمواری اس بیٹ مریک۔ صدر مملکت تون پاک مسلم اتحاد نا عہدیدار آک ہم اوڑدہی کریر۔ صدر مملکت اوفتے بنگالی اٹ ہیت کروک آ پاکستانی تا ویل آتاایسری نا باوری ترفے و پارے کہ اوفتا ویل آتا ایسری نا چرجوئی ٹی ہروڑگام گیج کننگے۔
