اسلام آباد۔ 17 اپریل (اے پی پی) بنجائی حکومت جان جوڑی نا آسراتی تا ودوک آ طلب تون مون تننگ کن اڑزان و رسینگ نا قابل آسراتی تیا چکار کرسا تینا شاندار اختراعی گام گیج آتا کمک اٹ ملک اٹی خصوصی طبی و سلابتی آسراتی تا فراوانی نا بابت نمان پیش رفت کرینے۔ وزیراعظم شہباز شریف ناکماشی ٹی حکومت نا کنڈآن بنجائی دارالحکومت اٹی آٹزم سینٹر نا جوڑ کننگ، دماغی جان جوڑی نا ہیلپ لائن و زندءِ بچفوک آ سی پی آر ٹریننگ پروگرام نا بناء، و بندی تے طبی تعلیم دوئی کننگ نا موکل تون اوار ہرا گام گیج آتے چست کننگانے ، دا گام گیج آک اوفتا زیات بریبر و پوسکن آ جان جوڑی نا خیالداری نا نظام نا ٹہیفنگ تون اوار گیشتر عزم انا درشانی ءُ۔ جان جوڑی نا بشخ اٹی سخی تا کمکاری نا است بڈی کن وزیراعظم ساڑی ہی ٹی لاہور اٹی 600 کٹ آتیا تالان انڈس ہسپتال نا بناءِ کرے و سکتی تیا زور شاغا کہ او جان جوڑی و تعلیم نا پڑاٹ مون آ بریر و نیزگار و حقدار مخلوق نا تکلیف آتا چٹفنگ کن است انا حب اٹ عطیہ ایتر ۔ اولاہور اٹی شش مزلہ و 350 کٹ آتیا تالان سلیم میموریل ٹرسٹ ہسپتال نا بناءِ ہم کرے و دااومیت نا درشانی ءِ کرے کہ دا آسراتی جہانی آب انا درمان نا آسراتی تتون ناجوڑ انسانیت نا خذمتءِ کیک۔ شہباز شریف بطور وزیراعلیٰ پنجاب تینا دور اٹی صوبہ ٹی چندی ہسپتال جوڑ کرے و اپ گریڈ کرے۔ ترک حکومت نا کنڈآن مظفر گڑھ اٹی 250 کٹ آتیا تالان پوسکن آ رجب طیب اردوان ہسپتال 2010 نا نوکاپ نا وخت آ جوڑ کننگاسس۔ وزیراعظم شہباز شریف ہسپتال نا بنائی دود آن تران کرسا پارے کہ وزیراعلیٰ پنجاب مرسا او 20 ارب روپئی مچ کرسا پنجاب انڈومنٹ فنڈ ءِ فعال کرے و دا فنڈ آن بھلو کچ اسے ٹی چوری آ چنااتا کفالت ءِ کرے ہرادے بدبختی اٹ تدوک آ حکومت بند کرے ۔ ولے او باور کرفے کہ اونا حکومت انڈوومنٹ فنڈ و سی ایم سیلف ایمپلائمنٹ اسکیم تون اوار داوڑناغٹ الس سنگت اسکیم تے بحال کیک۔ مسلم لیگ (ن) نا حکومت 20 ارب روپئی نا خڑچ آن پی کے ایل آئی ہسپتال اس ہم جوڑ کریسس ہراڑا مسکوہی حکومت سیاست کریسس ہراڑان بھاز نسخان مس۔ مچ آ پنجاب اٹی ہیپاٹائٹس فلٹر سینٹر جوڑ کننگا ہراڑے مچ آ ملک آن ناجوڑ آک درمان کن بسرہ۔ کبینی نا خلوک الس کن دوائی تے اڑزان کننگ و اوفتسکان رسینگ ءِ پک کننگ کن حکومت الس ءِ ریلیف تننگکن 20 دوائی تا نہاد آتیٹی 30 درسد اسکان کمتی کرے۔ گیشتر دوائی تا نہاد آتے ٹی کمتی نا کچ 30 درسد ئس و 54 ایلو دوائی تا نہاد آتے ہم مقرر کننگا۔ وزیراعظم زوت آتیٹ شاری تا ذہنی صحت و تندرستی کن ’’ہمراز‘‘ ذہنی صحت ایپلی کیشن و مربوط ہیلپ لائن 1166 نا بناءِ کرے۔ شاری اگہ ڈپریشن، ٹینشن یا ذہنی تناؤ نا گواچی ءُ تو 1166 آ مفت کال کرسا ماہرین نفسیات و ڈاکٹر آتون مشورہ کننگ کیرہ۔ ساڑی حکومت لس مخلوق کن وزیراعظم نیشنل سی پی آر ( کارڈیوپلمونری ریسوسی ایشن ) پروگرام نا بناءِ کرے تانکہ است انا دورہ ہلنگ نا حالیت اٹ مریض نا زند ءِ بچفنگ مرے۔ حکومت زوت آتیٹ بنجائی دارالحکومت اٹی چناتیکن نیشنل آٹزم اینڈ مینٹل ہیلتھ سینٹر اس جوڑ کرینے ہرا ملک اٹی داوڑنا اولیکو بڑزکو آب انا آسراتی ءِ۔
