ایبٹ آباد۔21مئی (اے پی پی) ڈپٹی اسپیکر قومی اسمبلی مرتضیٰ جاوید عباسی پارینے کہ مسلم لیگ (ن) نا حکومت داواتیان بیدس حقی وڑاٹ الس ناخذمت اٹی اختہ ئِ۔ وزیراعظم محمدنواز شریف ملک ئِ شونداری نا کسر آ روان کرینے۔ دھرنہ تروک آک صوبہ نا الس ئِ محرومی تیان بیدس ہچ اس تتنو۔ بروک آ گچین کاری تیٹی الس کارکڑد نا بنداو آ وونٹ ایتک۔ این اے 18 ٹی سوئی گیس آن محروم علاقہ غاتیٹی سوئی گیس فراوانی نا ڈٹ آک ترندی اٹ جاری ئُ ۔ او یک شنبے نا دے پسوال میاں ٹی 61.85ملین روپئی نا خڑچ انا سوئی گیس ڈٹ انا بنائی دود آن تران کریکہ۔ دودآن ضلع کونسلرز شوکت ہارون خان، قاضی آصف، کسان کونسلرنذیر احمد گجر، جنرل کونسلررخسار، ممبر مصالحتی کمیٹی صوبیدار(ر) محمود خان ہم تران کریر۔ داکان بیدس پسوال میاں غا بننگ آ علاقہ والاک ڈپٹی اسپیکر ئِ جم و جوش اٹ بخیر کریر۔ دود آن تران کرسا ڈپٹی اسپیکر پارے کہ وزیراعظم محمد نواز شریف نا سروکی ٹی مسلم لیگ (ن) نا حکومت الس نا محرومی تا چٹفنگ نا تہیہ کرینے۔ تحریک انصاف نا صوبائی حکومت السی ویل آتے ایسر کننگ اٹی پورو وڑاٹ بے سہب مسنے۔ الس دھرنہ سیاست ئِ مسترد کرینے۔ بروک آ گچین کاری تیٹی خیبر پختونخوا نا الس مسلم لیگ (ن) ئِ بھلو گیشتری اسے اٹ سرسہب کیک۔ ڈپٹی اسپیکر پارے کہ ملک آن بجلی نا تنکی نا چٹفنگ کن بجلی نا ڈٹ آتیا ترندی اٹ کاریم برجائِ ہراڑآن بھاز زوت ملک آن لوڈشیڈنگ چٹک۔ خیبر پختونخوا نا وزیر آک ایلوفتا شونداری ڈٹ آتیا تینا پن انا تختی خلسا تینا سیاست ئِ زیبدار کننگ نا بے سہب کوشست کننگ ئُ۔ الس ئِ داسہ تختی تا سیاست آن بے وقوف جوڑ کننگ مفک۔ ڈپٹی اسپیکر پارے کہ مسلم لیگ (ن) نا حکومت السی خذمت آ یخین تخک ۔ خلقی علاقہ غاتا پسماندگی ئِ مر کننگ کن ٹھوس و جامع گام گیج چست کننگ انگ ئِ۔ دود آن تران کرسا ضلع کونسلر شوکت ہارون خان و کسان کونسلر نذیر احمد گجر پاریر کہ ڈپٹی اسپیکر مرتضیٰ جاوید عباسی پسوال میاں و ایب وکیب علاقہ غاتے سوئی گیس فراوان کرسا الس نا دیرینہ خواست ئِ پورو کرینے۔ پسوال میاں و نواحی علاقہ غاتا الس بروک آ گچین کاری تیٹی مسلم لیگ (ن) و مرتضیٰ جاوید عباسی ئِ بھلو گیشتری اسے اٹ سرسہب کیک۔
