اسلام آباد۔ 14 اپریل (اے پی پی) اسپیکر قومی اسمبلی راجہ پرویز اشرف و ڈپٹی اسپیکر زاہد اکرم درانی ئسک پارینو کہ مسلم امہ ءِمون تروک ویل آتا ایسری کن ننے تینا صف آتیٹی سیوت ءِ قائم کننگ نا گرج ءِ۔ پاکستان فلسطینی الس تون سلوک ءِ و ہر پلیٹ فارم آ اوفتا سفارتی و اخلاقی مخ تفی ءِ برجاتخک۔ یوم القدس نا وخت آ تینا اسہ بیان اسے ٹی اسپیکر پارے کہ مچ آ مسلم اٹی روچہ مبارک نا آخیریکو جمعہ مبارک فلسطینی تتون یکجہتی نا درشانی نا دے ءِ ہرا تدوک آ کیہی دہائی آن اسرائیلی فوج انا ظلم و جور انا گواچی ءُ۔ ا وپارے کہ پاکستان فلسطینی الس نا حق خودارادیت نا پبی مخ تفیءِ کیک و مچ آ قوم مشکل نا داساہت اٹی تینا فلسطینی ایڑھ و ایلم تتون پورو یکجہتی نا درشانی ءِ کیک۔ اواقوام متحدہ غا فلسطین اٹی اسرائیلی فوج انا کنڈآن کروک آ ظلم انا توننگ کن تینا پبی کڑد ءِ ادا کننگ نا گرج آ زور شاغا۔ اسپیکر مسجد اقصیٰ ٹی نمازی تیا اسرائیلی فوج انا ساڑی آ جلہو آتا سختی اٹ مذمت ءِ کرسا پارے کہ کودک فلسطینی تے نماز اٹی شہید کننگ بربریت و انسانی حق انا خلاف ورزی تا بدترین درور ءِ۔ اوانسانی حق انا رکھ اکن کاریم کروک آ جہانی تنظیم تیا اسرائیل نا کنڈآن کودک فلسطینی الس نا برخلاف ظالمانہ گام گیج انا توننگ تینا کلیدی کڑد ءِ ادا کننگ نا گرج آ زور شاغا۔ اوساڑی آ او آئی سی نا دیوان اٹی مسجد اقصیٰ نا اسرائیلی آ جلہو نا مذمت ءِ خیرمقدم ءِ کرسا پارے کہ غٹ مسلم ملک آک تینا صف آتیٹی سیوت کرسا مسلم امہ ءِ مون تروک بحران تیان کشنگ کیرہ۔ داوخت آ ڈپٹی اسپیکر زاہد اکرم درانی پارے کہ اینونادے ننے فلسطینی تا جہد آجوئی نا بے مٹ داستان تا یات ترفک۔ اوپارے کہ فلسطینی تدوک آ7 دہائی آن اسرائیل نا دوتے ٹی ظلم و بربریت نا گواچی ءُ و اسرائیلی سیکورٹی فورس آتا کنڈآن مسجد اقصیٰ آ جلہو اونااسہ پیدوار ءُ درور اسے۔ اواقوام متحدہ سلامتی کونسل تون اوار غٹ انسانی حق انا رکھ اکن کاریم کروک آ تنظیم تیا زور شاغا کہ او اسرائیل نا کنڈآن فلسطینی تیا کروک آ ظلم ءِ توننگ کن تینا کڑد ءِ ادا کیر۔
