کوئٹہ۔ 14 اپریل (اے پی پی) سیکرٹری کشت وکشار بلوچستان امید علی کھوکھر پارینے کہ چنکاعئید آن دمدستی پد بلوچستان نا 4 ضلع غاتیٹی مفت برنج نا بج و ایلو گڑاتا بشخنگ نا بناءِ کننگک، بلوچستان اٹی حکومتی کوشست آتا سوب برجاسال گرج آن زیات خولم نا پیدوار مسنے۔ داہیت ءِ او جمعہ نادے آ داڑے صحافی تا اسہ ٹولی اسے تون گپ وتران کرسا پارے۔ امید علی کھوکھر پارے کہ صوبائی حکومت و صوبائی وزیر کشت وکشار میر اسد بلوچ نا کماشی ٹی محکمہ کشت وکشار صوبہ ٹی کشت وکشار نا شونداری و بزغرآتے آسراتی فراوان کننگ کن غٹ دوئی وسیلہ غاتے کاریم اٹ اتنگ ءِ۔ اوپارے کہ 2022 اٹی بلوچستان اٹی بشام نا پِر تا سوب آن کشت وکشار ءِ بھلو نسخان اس رسینگا باغک، فصل آک، سوزیک بھس مسر ہرافتا کساس کم و ود 300 ارب روپئی خلنگاسس محکمہ کشت وکشار بلوچستان زمیندار و بزغر آتے ریلیف تننگ و تینا نت تیا دُوارہ سلفنگ کن ستمبر، اکتوبر اٹی خولم نا بج انا مفت فراوانی کن تگ و دود نا بناءِ کننگ نا بھاز مالی مشکل آتیان پد ہم وزیراعلیٰ و صوبائی وزیر کشت وکشار نا کوشست آتیان کشت و کشار نا بحالی کن خولم نا بج انا مفت فراوانی کن بست وبند کرے خولم نا بج اناشفاف وڑاٹ بشخنگ و رسینگ نا چرجوئی ٹی ہر ضلع ٹی ضلعی انتظامیہ (ڈی سی) نا کماشی ٹی کمیٹی اس جوڑ کننگا صوبہ پنجاب آن2،2 ارب نا گچین خولم نا بج انا 381500 گونی بٹنگفسا صوبہ نا 34 ضلع غاتیٹی بزغر و زمیندار آتیٹی مفت بشخنگا ہرانا سوب آن بلوچستان اٹی برجاسال خولم نا ریکارڈ پیدوار مسنے۔ اوپارے کہ بلوچستان نا خولم نا گرج داوخت آ 15 لکھ ٹن ءِ وخت اس کہ بلوچستان اٹی 16 لکھ ٹن خولم ودی مسنے خولم زیات مننگ نا سوب آن حکومت نا کنڈآن زمیندار آتے مفت خولم نا بج انا فراوانی ءِ۔ اسہ سوج اسے نا ورندی ٹی امید علی کھوکھر پارے کہ 2022ء ٹی بشام نا ترند انگا پِر و نوکاپ آن پد ایشیئن شونداری بینک بلوچستان ءِ 15 ملین ڈالر نا وام وخت اس کہ 5 ملین ڈالر نا گرانٹ تننگ نا پڑو کرے۔ اوپارے کہ 5 ملین نا گرانٹ آن بلوچستان نا4 ضلع صحبت پور، جعفر آباد، نصیر آباد، جھل مگسی ٹی زمیندار آتے مفت برنج نا بج و ایلو کشاری مشینری و گڑاتا فراوانی نا پلان اس جوڑ کننگا دا پلان اے ایف او نا محکمہ کشت وکشار تون اواری اٹ جوڑ کرینے۔ اوپارے کہ چنکاعئید آن دمدستی پد بلوچستان نا 4 ضلع غاتیٹی مفت برنج نا بج انا فراوانی نا بناءِ کننگک ہراڑان زمیندار و بزغرآتے دُوارہ تینا نت تیا سلفنگ اٹ کمک رسینگک۔ اسہ سوج اسے نا ورندی ٹی اوپارے کہ بلوچستان اٹی ودی مروک آ خولم نا 60درسدو برنج نا 70 درسد بشخ نصیر آباد و جعفرآباد اٹی ودی مریک ۔
