حکومت پوسکن آ مالی سال انا بجٹ اٹی خصوصی بندغ آتا شرحالی کن بھلو فنڈ اس جتا کننگ ئِ، پارلیمانی سیکرٹری مائزہ حمید

اسلام آباد۔ 21مئی (اے پی پی) کیپیٹل ایڈمنسٹریشن اینڈ ڈویلپمنٹ ڈویژن (کیڈ) نا پارلیمانی سیکرٹری مائزہ حمید پارینے کہ حکومت پوسکن آ مالی سال انا بجٹ اٹی خصوصی بندغ آتا شرحالی کن بھلو فنڈ اس جتا کرینے۔ یک شنبے نا دے داڑے ”اے پی پی“ تون ہیت وگپ کرسا اوپارے کہ خصوصی بندغ آتے کن اڈ تروک ادارہ غاتے کن اسہ ارب روپئی جتا کننگ انگ ئِ۔ اوپارے کہ ساڑی حکومت خصوصی بندغ آتے کن چار پوسکنئُ ڈٹ انا بنائِ کرے ، خصوصی بندغ آتے راج انا فعال و مفید شاری جوڑ کننگ حکومت نا عزم ئِ و دارداٹ غٹ ممکنہ وسیلہ غاتے کاریم اٹ اتنگ انگ ئِ۔ پارلیمانی سیکرٹری پارے کہ وزیراعظم نا تعلیمی بشخ انا اصلاحات نا پروگرام نا رداٹ و نظامات تعلیمات نا چاروکی ٹی خصوصی بندغ آتے کن اڈ تروک تعلیمی ادارہ غاتے غٹ پوسکن آ آسراتی تیان مزین کننگک۔ اوپارے کہ اینخو سال 250 خصوصی طالب علم آتے خصوصی بندغ آتے کن اڈ تروک تعلیمی اسکول آتیٹی داخل کننگا۔ داطالب علم آتے ٹرانسپورٹ نا آسراتی فراوان کننگ انگ ئِ۔ اوپارے کہ وزارت کیڈ سرکاری ملازمت آتیٹی خصوصی بندغ آتا کوٹہ ئِ ودفنگ آ چکار تخنگ ئِ۔ اسہ سوج اسے آ اونا پاننگ اس کہ نزور بصارت نا حامل طالب علم آتے آپٹیکل گلاسز فراوان کننگک وخت اس کہ ضرورت مند خصوصی طالب علم آتا آپریشن کن بست وبند آتے ہم المی جوڑ کننگک۔ اوپارے کہ وزیر مملکت کیڈ ڈاکٹر طارق فضل چوہدری ساڑی ہی ٹی خصوصی طالب علم آتیٹی ویل چیئر، سلائی مشین ، واکرز و ایلو کمکاری آ گڑاتے بشخ و پانٹ کرینے۔ اوپارے کہ راج انا غٹ تپہ غاتے خصوصی بندغ آتے بنجائی دنگ اٹی اتنگ کن تینا کڑد ئِ ادا کروئی مریک۔