سمرقند۔ 13 اپریل (اے پی پی) وزیر مملکت خارجہ امور حنا ربانی کھر سمرقند اٹی اوغانستان نا ہمسایہ ملک آتا چار میکو دیوان نا وخت آ پنچ شنبے نادے آ ازبکستان نا قائم مقام وزیر خارجہ سیدوف باختیور اودیلوووچ تون اوڑدہی کرے۔ دفترخارجہ نا رداٹ ہڑتوم آ وزیر آک ازبکستان و پاکستان نا نیام اٹ غٹ بشخ آتیٹی دوستانہ تعلقداری خاص وڑاٹ رابطہ ، واپار و زرکاری آن بیدس السی رابطہ غاتیا گپ وتران کریر۔ ہڑتوم آ فریق آک پاکستان ، ازبکستان و اوغانستان نانیام اٹ ٹرانس اوغان ریلوائی ڈٹ آ پیش رفت آ ہم گپ وتران کریر و دا ہیت آ امنا کریر کہ دا ڈٹ انا وخت آ پوروی آن علاقائی رابطہ غاتیٹی ودکی مریک۔ اوڑدہی نا وخت آ ہڑتوم آک اقتصادی، واپاری و زرکاری نا بشخ آتیٹی ہڑتوم آ کنڈآتا ہن و بر نا ساڑی آ رفتار آ است جمی نا درشانی ءِ کریر۔ وزیر مملکت امور خارجہ حنا ربانی کھر و ازبکستان نا قائم مقام وزیرخارجہ اوڑدہی ٹی ہڑتوم آ کنڈآتا واپار ءِ پین ودفنگ کن پاکستان و ازبکستان نا نیام اٹ اولیتی واپاری معاہدہ (پی ٹی اے) ءِ زوت فعال کننگ آ ہم گپ وتران کریر۔
