اسلام آباد۔ 13 اپریل (اے پی پی) بنجائی وزیر واپار سید نوید قمر تون ایران نا سفیر سید محمد علی حسینی الوداعی اوڑدہی کرے، ہڑتوم آ راہشونک تین پہ تینی واپاری و اقتصادی تعلقداری تے مون آ دننگ نا عزم انا درشانی ءِ کریر۔ داوخت آ سید نوید قمر پارے کہ ایران و پاکستان نا نیام اٹ ہڑتوم آکنڈآتا واپاری و اقتصادی تعلقداری تے ودفنگ کن سفیر نا کوشست قابل قدر ءِ۔ اوپارے کہ ہڑتوم آ ملک آک نئے بیرہ ہمسایہ ءُ بلکن اوفتا ایلمی نا تعلقداری ہم ارے۔ پاکستان وایران نا واپاری کچ حقی لائخی تون مطابقت تخپک ،ننے اودے حقی کہول اسکان ودفنگ کن اسہ جامع وڑوڈول اس جوڑ کروئی مریک۔ اوپارے کہ غیر واپاری اڑاند دُن کہ پاکستانی ڈیور وکاروباری برادری کن ویزافیس، تصدیق نا فیس ، روڈ خراج، لوڈ خراج و ایرانی قونصلیٹ نا کنڈآن ٹرک آتیا خلوک ایلو چارج آک واپار ءِ زہمی کننگ اٹی ءُ۔ ایرانی سفیر پارے کہ بنجائی وزیر نوید قمرناکنڈآن پبی کمکاری نا نتیجہ ٹی ہڑتوم آ ملک آتا نیام اٹ اولیکو وار ہڑتوم آ کنڈآتا واپار اٹی 15 درسد ودکی مس، منڈی۔ پشین پاکستان ۔ ایرانی سیمی مارکیٹ، ہرانا2 مئی آ افتتاح مننگ ءِ، ایران وپاکستان نا نیام اٹ واپار ءِ مون آدیک۔ ہڑتوم آ فریق آک ہڑتوم آ ملک آتا نیام اٹ واپاری و اقتصادی تعلقداری تے پین مون آ دننگ نا عزم انا ہم درشانی ءِ کریر۔
