اسلام آباد/بیجنگ۔ 21مئی (اے پی پی) اولیکو اورنج لین میٹرو ٹرین جولائی ٹی چین آن پاکستان آ سرمریک۔ سرکاری ذرائع نا رداٹ لاہور اٹی اورنج لین میٹرو ٹرین کن چین نا کمپنی جم وڑاٹ 27 ٹرین فراوان کننگ ئِ و دارداٹ اولیکو میٹرو ٹرین جولائی ٹی حکومت پنجاب نا حوالہ کننگک، ایلو 26ٹرینک داسال انا ایسر اسکان پاکستان آ سرمریرہ۔ اپریل 2015ءٹی چین و پاکستان لاہور اٹی ریپڈ ماس ٹرانزٹ سسٹم نا رداٹ اورنج لین نا جوڑ جاڑ کن فریم ورک قول و اقرار آ دستخط کریسر۔ پاک چین اقتصادی راہداری (سی پیک) نا فریم ورک نا رداٹ اڈ ہلوک آ اورنج لین میٹرو ٹرین نا جوڑ جاڑ نا ٹھیکہ چائنا ریلوے کارپوریشن و چائنا انڈسٹریل کارپوریشن آ تالان کنسورشیم ئِ تننگانے۔ اورنج لین میٹرو ٹرین اکن بنائی وڑاٹ 27ٹرین تیار کننگ انگ ئِ، اولیکو ٹرین گدرینگوک آ ہفتہ چین نا نیامی صوبہ ہونان نا کمپنی سی آر آر سی ژو ژو لوکوموٹوز کارپوریشن لمیٹڈ اٹی تیار مسنے، دا ٹرین پنچ بوگی تیا تالان ئِ۔ دا ٹرین اٹی انرجی سیونگ ایئر کنڈیشننگ نظام نصب کننگانے وخت اس کہ دانا زیات آن زیات رفتار 800 کلومیٹر فی گھنٹہ مریک۔ ٹرین اکن ہراڈیزان ئِ جوڑ کننگانے او پاکستان نا قومی پھل و بادشاہی مسیت نا گنبد آتیان مزین ئِ۔ داپروجیکٹ نا منیجر وانگ پانگ پارے کہ اورنج لین میٹرو ٹرین اکن ہمو معیار تے مون آ تخنگانے ہرامعیار تا رداٹ بیجنگ و شنگھائی ئِ ملفوک آ ٹرین نا نظام قائم کننگانے۔ 26کلو میٹر مریس ریلوے لین آ 26اسٹیشن مریرہ ہرافتیان اِرٹ ڈغار اٹی اڈ تننگرہ۔ داڈٹ آ ہڑتوم آ ملک آتا انجینئر و تکنیک کار کاریم کننگ ئُ۔
