اسلام آباد۔ 13 اپریل (اےپی پی) صدر مملکت ڈاکٹر عارف علوی کشاری شونداری بینک انا اسسٹنٹ نائب صدر ءِ زالبول آتے زیزاریفنگ آ نوکری آن برخاستگی ناسزا برقرار تخسا انسداد ہراسیت محتسب نافیصلہ نا برخلاف دوبہ دار نا درخواست ءِ مسترد کرے۔ ایوان صدر نا پریس ونگ آن پنچ شنبے نادے آ جاری بیان نا رداٹ اسسٹنٹ نائب صدر (دوبہ دار) آ زالبول آفیسر ءِ جنسی وڑاٹ زیزاریفنگ نا دوبہ پک مسوسس۔ صدر مملکت بنجائی محتسب انسداد ہراسیت نا کنڈآن دوبہ غا عائد 5 لکھ نا جرمانہ ءِ ودفسا 6 لکھ روپئی کرے۔ صدر مملکت باندات آ کشاری شونداری بینک انا درخواست ءِ ہم مسترد کرے۔ صدر مملکت پارے کہ دوبہ دار انسداد ہراسیت محتسب ناکارروائی ٹی بے ڈولی نا پیدواری اسے ٹی بے سہب مس، باندات آ انسداد ہراسیت محتسب نا کارروائی شاہدی تا سہی جاچ آ تالان ءِ۔ صدر پارے کہ پاکستان اٹ آئین ، کانود و اونا نفاذ ناکلہو واشگاف و پیدوار ءِ، نن اسہ ہندن ءُ راج اس خوانہ ہراڑے زالبول آتے کاریم کننگ نا آجوئی مرے۔ ڈاکٹر عارف علوی پارے کہ ہندن ءُ راج اس جوڑ کننگ خوانہ ہراڑے غٹ السی ہند آتیا زالبول آتیکن رکھ چاگڑد مرے۔ صدر پارے کہ غاوتروک آتے کانود و قاعدہ نا سراسر خلاف ورزی ءِ کرسا ملازمت آن برطرف کننگا، زالبول غاو تروک نا برخلاف ہچ ءُ باقاعدہ انکوائری اس کننگتو و نئے سماعت نا موقع تننگا۔ صدر مملکت پارے کہ زہمی زالبول نا برطرفی نا پرمان غیرکانودی ءِ۔برقرار سلنگ کپک، غاوتروک داسہ ہم بینک اناملازم ءِ اینو اسکان تینا غٹ فائدہ غاتا حقدار ءِ ، دوبہ دار جنسی ہراسانی نا دوبہ غا غاوتروک تون شرہ کننگ اٹ بے سہب مس۔ صدر مملکت پارے کہ غاوکروک آنا کنڈآن پیش کروک آ شاہدیک پت انا قابل لگنگءُ۔ سرجم حوال آتا ردساٹ گوجرانوالہ ٹی کشاری شونداری بینک انا برانچ اٹی کاریم کروک آ اسہ زالبول آفیسر اس دوبہ دارنا برخلاف زیزاریفنگ نا غاو درج کرفے، زالبول دوبہ خلک کہ دوبہ دار نا دفتر اونا دفترنا خڑک ئسک، موبائل فون آ اونا ویڈیو ءِ ریکارد کرسا ہلنگا۔ غاو کروک حلف نامہ پیش کرے کہ دوبہ دار اودے جنسی وڑاٹ ہراساں کرے و جونی وڑاٹ دُوخلک۔ شرہ ٹی دوبہ دار جنسی زیزاریفنگ نا مخصوص دوبہ غا ہچ ءُ سوج اس کتو۔ انسداد ہراسیت محتسب تینا فیصلہ ٹی دوبہ دار ءِ غاو کروک ءِ جنسی وڑاٹ زیزاریفنگ نا ڈوہدار گونداسس۔
