وزیراعظم شہباز شریف نا شہید فائر فائٹرآتے خراج عقیدت،خاخر لگنگ نا واقعہ غاتا مون  ءِ توننگ کن جوان  ءُ حکمت عملی اس تیار کننگ نا پارت

اسلام آباد۔ 13 اپریل (اے پی پی) وزیراعظم محمد شہباز شریف کراچی ٹی 2 فیکٹری تیٹی خاخر ءِ کسفسا شہید مروک آ 4 فائر فائٹرآتے خراج عقیدت پیش کرسا خاخر لگنگ نا واقعہ غاتا مون ءِ توننگ کن جوان ءُ حکمت عملی اس تیار کننگ نا پارت کرینے۔ پنچ شنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم شہباز شریف خاخر ءِ کسفوک آ عملہ نا شہید ورناتا خاہوت تون ہڑزخواہی و ٹھپی مروک آتون ہمدردی نا درشانی ءِ کرے۔ وزیراعظم پارے کہ خلق خدا نا جان ءِ بچفسا شہید مروک آ فائر فائٹرآتا نرزوری و خذمت نا جوزہ ستاکڑزک۔ وزیراعظم سندھ حکومت ءِ شہید فائر فائٹرآتا خاہوت نا مالی کمک و چناتا تعلیم و کفالت کن گام گیج کننگ نا پارت کرے۔ وزیراعظم ٹھپی مروک آتے درمان نا گچین آسراتی فراوان کننگ نا ہم پارت کرے و ٹھپی مروک آتا زوت دراخ جوڑی کن دعا کرے۔