اسلام آباد۔ 12 اپریل (اے پی پی) وزیر مملکت خارجہ امور حناربانی کھر 13 اپریل آ سمرقند اٹی اڈ ہلوک ا وغانستان نا ہمسایہ ملک آتا چارمیکو دیوان اٹی پاکستانی ڈل انا کماشی ءِ کیک۔ چارشنبے نادے آ دفترخارجہ نا رداٹ اوغانستان نا ہمسایہ ملک آتا وزارتی دیوان نا وخت آ وزیر مملکت ایلو شریک ڈل آتا راہشون آتون ہڑتوم آ کنڈآتا اوڑدہی کیک۔ اوغانستان نا ہمسایہ ملک آتا میکنزم 2021اٹی پاکستان نا گام آ جوڑ کننگاسس ہرانا مسخت اوغانستان نا حالیت آتیا علاقائی نقطہ نظر ءِ تیار کننگ ءِ۔ پاکستان 8 ستمبر 2021 آ ہمسایہ ملک آتا وزیر خارجہ غاتا اولیکو دیوان نا مہمانداری ءِ کرے۔ پاکستان نومبر 2021اٹی ایران نا دارالحکومت تہران اٹی مروک آ ارٹ میکو دیوان و مارچ 2022 اٹی چین نا شار تونشی ٹی اڈ ہلوک آ مسٹ میکو دیوان اٹی بشخ ہلک۔ ترجمان دفترخارجہ تینا بیان اٹی پارے کہ دا وڑوڈول اوغانستان نا ہمسایہ ملک آتا نیام اٹ امنائی سلاہ ودی کننگ اٹ کمک ایتک ہرا اوغانستان نا حالیت آتا براہ راست اسٹیک ہولڈر ءِ ۔ بیان نا رداٹ پاکستان اسہ پرامن، سوگو، وتواجہ، شونہال و منسلک اوغانستان نا اسیجائی مسخت آتے مون آ دننگ کن غٹ کوشست آتا مخ تفی ءِ برجاتخک۔
