کوئٹہ۔ 12 اپریل (اے پی پی) چیئرمین سٹینڈنگ کمیٹی پیٹرولیم و ریسورسز سینیٹر عبدالقادر پارینے کہ 1973 نا آئین غٹ سیاسی فورم و ادارہ غاتا دنگ انا تعین ءِ کیک نن دا دنگ اٹ رہینگسا باندات آتے بایدے مون آ دین تانکہ جمہوریت تینا اصل روح انا رداٹ مننگ کے ، 1973 نا آئین لس بندغ نا بنداوی حق انا رکھ ءِ پک کیک آئین نا رداٹ ملک وقوم ءِ مون تروک ویل و مشکل آتا چٹفنگ ءِ پک کننگ مریک، آئین آ عملدرآمد ہی بقاریاست نا ضامن ءِ۔ آئین پاکستان نا گولڈن جوبلی نا چرجوئی ٹی حکومتی کہول آ اڈ تروک آ دود آتا بابت چیئرمین سٹینڈنگ کمیٹی پیٹرولیم و ریسورسز سینیٹر عبدالقادر پارے کہ پاکستان اسہ آجو و وتواجہ ءُ ملک اسے ، اللہ تعالیٰ پاکستان ءِ آئین و ایٹمی واک اٹ سرفراز کرینے امنائی آئین نا جوڑ کننگ مسکوہی وزیراعظم ذوالفقار علی بھٹو نا ناقابل فراموش کارنامہ اسے۔ اوپارے کہ جوان وڑاٹ امنا کننگک کہ داآئین پاکستان نا غٹ اکائی تے زمزیر اٹی کرینے دا امنائی آئین پاکستان آئینی سیم تا سالمیت ءِ پک کرینے ہندا وڑ پاکستان ءِ دوئی جوہری لائخی پاکستان نا جغرافیائی سیم تے رکھ و ناقابل تسخیر جوڑ کرینے۔ اوپارے کہ دا انمول نعمت آتا دوئی کننگ آن پد داسہ دا سیاست دان و آئینی ادارہ غاتا زمواری ءِ کہ امور ریاست و امور حکومت آئینی دنگ اٹ رہینگسا گچین وڑاٹ سر ایتے غیر آئینی گام آن پاناد کننگے تانکہ ملک انا سالمیت خطرہ ٹی تمپ۔ اونا پاننگ ئسک کہ آئین نا پنجا سال انا دود آتا اڈتننگ جوان ءُ فیصلہ اسے ولے گرج داہیت انا ءِ کہ آئین نا رداٹ فیصلہ کرسا و امور حکومت ءِ سرترسا نن ملک ءِ سوگوی اس تننگ کینہ۔ اوپارے کہ آئین ہر پاکستانی نا حق و فرض انا پیدوار تعین ءِ کیک دا حکمران تا اولی زمواری ءِ کہ او لس پاکستانی نا حق انا رکھ ءِ پک کیر و ولدا اودے اونا فرض آن بہرہ مند کیر۔ اوپارے کہ 1973 ناآئین غٹ سیاسی فورم و ادارہ غاتا دنگ انا تعین ءِ کیک نن دا دنگ اٹ رہینگسا باندات آتے بایدے مون آ دین تانکہ جمہوریت تینا اصل روح انا رداٹ مننگ کے، 1973 نا آئین لس بندغ نا بنداوی حق انا رکھ ءِ پک کیک آئین نا رداٹ ملک و قوم ءِ مون تروک ویل و مشکل آتا چٹفنگ ءِ پک کننگ مریک آئین آ عملدرآمد ہی بقاریاست نا ضامن ءِ آئینی دنگ درحقیقت جمہوریت ءِسوگوی ایتک، جمہوریت پاکستان نا آخبت ءِ و جمہوری نظام ہی الس نا بنداوی حق انا رکھ ءِ پک کیک۔
