اسلام آباد۔ 12 اپریل (اے پی پی) پاکستان نا آپریشن سوفٹ ریٹارٹ اٹی بھارتی MI-17ہیلی کاپٹر اسے نا تمنگ نا بارواٹی دعویٰ”سچ پک” مس۔ بھارتی فضائیہ نا گروپ کیپٹن سمن رائے چوہدری نا کورٹ مارشل رپورٹ کل ءِ پاش کرے۔ گروپ کیپٹن سمن رائے چوہدری و ونگ کمانڈر شیام نیتھانی پاک فضائیہ نا ورندی کارروائی ٹی “ہبکئی ” ٹی تینا ہی ہیلی کاپٹر ءِ خلسا بٹیسوس۔ میڈیا حوال آتا رداٹ بھارتی فضائیہ نا گروپ کیپٹن تینا ہی سرکڑدہ غاتا بلنڈر نا دوتا گواچی مس۔ بھارتی فضائیہ نا کنڈآن گروپ کیپٹن سمن رائے چوہدری ءِ “کورٹ مارشل” و ونگ کمانڈر شیام نیتھانی ءِ Severe Reprimandنا سزا بنفنگا۔ ہیلی کاپٹر ءِ خلسا بٹنگ نا نتیجہ ٹی بھارتی ایئر فورس نا 6 کارندہ غاتون اوار 7 بندغ زوال کریسر۔ گروپ کیپٹن سمن رائے چوہدری آ حکم عدولی کننگ و بدحواسی ٹی میزائیل یونٹ ءِ تینا ہی ہیلی کاپٹر ءِ خلنگ و بٹنگ آ کورٹ مارشل کننگا۔ ہبکئی و فریشانی نا عالم اٹ تروک آ پرمان تیان بھارتی فضائیہ ءِ 133.3کروڑ نا نسخان رسینگا۔ پاکستان نا انٹیلی جنس ایجنسیک ہمووخت آ بھارتی بلنڈر ءِ پاش کریسر ہرادے بھارت مسترد کرسا اودے سٹی و دروغ اس گونداسس۔ گروپ کیپٹن سمن رائے چوہدری و ونگ کمانڈر شیام نتھانی نا سزا پاکستان دعویٰ ءِ پک کرے۔ ہڑدے نا سکینڈل آک بھارتی فوج انا ساکھ و عزت ءِ مش تا کریر۔ آپریشن سوفٹ ریٹارٹ نا ہزیمت ءِ ڈکھنگ کن ونگ کمانڈر ابھی نندن ءِ ویر چکرا نا شرف ءِ ہم تننگاسس۔ بھارتی الس نا سوج ءِ کہ انت سکینڈل زدہ بھارتی فوج اسہ کسبی ءُ فوج اس پاننگ نا حقدار ءِ، ہرا پدریسہ تینا الس ءِ ریفیسا کرینے۔
