وزیرخارجہ بلاول بھٹو زرداری نا قومی اسمبلی ٹی آئین نا گولڈن جوبلی نا بابت اڈ ہلوک کنونشن آن تران

اسلام آباد۔ 10اپریل (اے پی پی) وزیرخارجہ بلاول بھٹو زرداری پارینے کہ 10 اپریل 1973ء آ ننا آئین جوڑمس، دا ننا 50 سال انا جہد نا یوم تاسیس ءِ، نن ملک انا الس ءِویل آتیان نجات ترفنگ خوانہ، نن ملکی ادارہ و  نظام نا بقاکن سازش آتے سگسا کرین، داسہ ہم ادارہ غاتیٹی ہندن ءُ تپہ اس ساڑی ءِ ہرا خواپک کہ میثاق جمہوریت چلینگے و ننا سیوت برجاسلے۔ دوشنبے نادے آ قومی اسمبلی ٹی آئین نا گولڈن جوبلی نا بابت اڈ ہلوک کنونشن آن تران کرسا بلاول بھٹو پارے کہ 1973 نا آئین اسلامی جمہوری و پارلیمانی ءِ پاکستان نا آئین ہی ہموزمزیر ءِ ہرا غٹ صوبہ غاتے گنڈوک تخانے۔ اوپارے کہ 10 اپریل نا دے ننا سلیبس اٹی بایدے مرے تانکہ پوسکن آ چین ءِ پاننگ مرے کہ 14 اگست 1947 آ پاکستان جوڑ مس و 10 اپریل 1973 آ ننا آئین جوڑ مس، دا ننا 50 سال انا جہد نا یوم تاسیس ءِ۔ اوپارے کہ ذوالفقار علی بھٹو شہید اسہ پنوک و تالان مروک ءُ ملک اسے آئین اس ترسا یکجا کرے۔ اوپارے کہ گودی بینظیر بھٹو شہید میثاق جمہوریت آ دستخط کرے انتئے کہ نن یخین تخنہ کہ سیاست دان و جمہوری واکدار آتا نیام اٹ فاصلہ و اختلاف آتا فائدہ غیرجمہوری واکدارآک ہرفرہ۔ اوپارے کہ اسہ سلکیٹڈ وزیراعظم اسے اتنگ نا سازش کننگا ہرانا مسخت 1973 نا آئین ءِ چٹفسا اسہ وار ولدا ون یونٹ جوڑ کننگ ئسک ، ملک انا جمہوری واکدارآک 10 اپریل 2022 آ متحد مرسا تاریخ اٹی اولیکو وار  جمہوری واکداری ءِ کاریم اٹ اتسا سلیکٹڈ وزیراعظم ءِ اُراغا گدریفیر۔ اوپارے کہ نن ملک انا الس ءِ ویل آتیان نجات ترفنگ خوانہ۔ اوپارے کہ نن ملک انا ادارہ و نظام نا بقا کن اوفتا سازش آتے سگسا کرین۔ عمران خان ہرا زرگزرانی جلہو کرسا ہناسس  نن ملک ءِ اوڑان کشنگ کن کوشست کننگ اُن۔ سیکورٹی نا حالیت آتے گچین کننگ کن قومی سلامتی کمیٹی ٹی فیصلہ مسنے دہشت گرد آتا برخلاف اسہ آپریشن اسے نا بناءِ کننگ اُن ، مستین آنبار دہشت گرد آتے شکست ایتنہ۔ اوپارے کہ ملک انا زرگزران و کبینی تاریخی دور آن گدرینگ انگ ءِ، ملک انا زرگزران ءِ سہی کننگ اسہ بندغ اسے نا کاریم اف داڑکن سیاسی سوگوی نا گرج ءِ، ننا ادارہ غاتے سنجیدہ مرسا دا بابت آئین نا رداٹ تینا کڑد ءِ اداکروئی مریک۔