اسپیکر قومی اسمبلی راجہ پرویزاشرف نا آئینی یات گار نا بنداو، یات گار شہداء آ حاضری و پارلیمنٹ ہائوس اٹی آئین نا تاریخ نا بابت عکسی نمائش  نا بنانا وخت آ تران

اسلام آباد۔ 10 اپریل (اے پی پی) اسپیکر قومی اسمبلی راجہ پرویز اشرف پارینے کہ 10 اپریل 1973 پاکستان نا سیاسی تاریخ نا ناقابل فراموش دے ءِ ہراتم قوم ءِ پارلیمانی، بنجائی و امنائی سلاہ غا تالان آئین اس تننگا۔ اوپارے کہ پاکستان نا شونداری و شونہالی جمہوری ، بنجائی ، اسلامی و امنائی  سلاہ غا تالان آئین نا حقی روح انا نفاذ تون گنڈوک ءِ۔اومستی پارےکہ اینو نادے شہید ذوالفقار علی بھٹو نا سیاسی پختگی و دانشمندی ءِ امنا کننگ نادے  ءِ ہرانا سیاسی دانش دا قوم ءِ 1973 نا امنائی آئین اس تس۔ داخیال آتا درشانی ءِ او دوشنبے نادے  آئین نا گولڈن جوبلی نا وخت آ آئینی یات گار نا بنداو، یات گار شہداء آ حاضری و پارلیمنٹ ہائوس اٹی آئین نا تاریخ نا بابت عکسی نمائش نا بنانا وخت آ کرے۔ اسپیکر قومی اسمبلی راجہ پرویز اشرف پارے کہ امنائی سلاہ غا تالان 1973 نا آئین نا منظوری پاکستان نا سیاسی تاریخ نا مدام یات تخوک ءُ لمحہ سے۔ اوپارے کہ آئین اٹی بیان کروک اصول اسلامی ، بنجائی جمہوری و پارلیمانی پاکستان نا ڈیک ءِ ایترہ و دا ہمواصول آک ئسر ہرافتا خاکہ ءِ قائد اعظم محمد علی جناح 11 اگست 1948 آ پاکستان نا اولیکو دستور ساز اسمبلی آن تینا اولیکو تران اٹی کریسس۔ پاکستان پیپلزپارٹی نا بانی شہید ذوالفقار علی بھٹو نا کماشی ءِ خراج تحسین پیش کرسا اوپارے کہ دا اونا سیاسی پختگی و دانشمندی ئسک ہرا قوم ءِ دا مقدس  دستاویز ءِ تس۔ اوکان پد اسپیکر قومی اسمبلی راجہ پرویز اشرف بنجائی وزیر حوالکاری  و شینکاری و مسکوہی چیئرمین سینیٹ میاں رضاربانی و ایلو پارلیمنٹ نا باسک آتون اوار آئین نا بالادستی کن تینا جون تے ندر کروک آ گمنام ہیرو تا یات گار آ حاضری تس و پھل آتا چادر اس شاغا۔ داکان بیدس اسپیکر قومی اسمبیل پارلیمنٹ ہائوس اٹی اسہ یات گاری ڈاک ٹکٹ، آئین سازی نا ہرلمحہ نا عکاسی ءِ کروک آ عکسی نمائش، آئین نا اصل رسم الخط نا نمائش و گولڈن جوبلی نا دود آتا چرجوئی ٹی کتاب آتا نمائش نا ہم بناءِ کرے۔