اسلام آباد۔ 10 اپریل (اے پی پی) سپریم کورٹ نا سینئر جج جسٹس قاضی فائز عیسیٰ پارینے کہ عدلیہ آئین نامحافظ ءِ، غٹ آئین نا دفاع و رکھ انا سوغند ہلکنو۔ دوشنبے نادے آئین پاکستان نا گولڈن جوبلی نا وخت آ قومی آئینی کنونشن آن تران کرسا اوپارے کہ تینا و تینا ادارہ نا کنڈآن او دا پاننگ خواہک کہ نن آئین نا کتاب اتون سلوک اُن، اللہ نا سیخاغان پد آئین ناکتاب نا سیخا ننا کاٹم تیاٹی ءِ و داننا درستی راستی ءِ، آئین پاکستان ہمووخت انا گچین مروک آ نمائندہ غاک امنائی وڑاٹ شین تسر و اونا منظوری ءِ تسر، نن اوڑا بایدے عمل کین ۔ اوپارے کہ پارلیمان و بیوروکریسی نا مسخت مخلوق نا خذمت ، عدلیہ نا کاریم آئین و کانود نا رداٹ فیصلہ کننگ، پارلیمنٹرینز آتا کاریم کانود جوڑ کننگ و ایگزیکٹیو نا کاریم او کانود نا رداٹ کارروائی کننگ ءِ۔ اوپارے کہ اودے گمر ءِ کہ اونا باوہ آل انڈیا مسلم لیگ نا سینٹرل ایگزیکٹیو کمیٹی نا باسک رہینگانے ، کنا باوہ بلوچستان و خیبرپختونخوا ءِ پاکستان نا بشخ جوڑ کننگ اٹ تینا کڑد ءِ ادا کرے۔ تحریک پاکستان نا وخت آ مخلوق اسہ تغ اسے نا پد اٹ ہنارہ، قائد اعظم محمد علی جناح و علامہ اقبال ہرا تغ ءِ ہراسر ہمونا بنداو آ سیاسی تحریک نا نتیجہ ٹی مچ آ دنیا ٹی مسلمان تا غٹ آن بھلا ملک جوڑ مس۔ اوپارے کہ مولوی تمیزالدین نا جاگہ غا کیبنٹ آف منسٹرز جوڑ کننگا، مولوی تمیز الدین چیف کورٹ آف سندھ اٹی تینا برطرفی ءِ چیلنج کرے۔ ہمووخت آ جسٹس کانسٹنٹائن و مسہ جج اودے بحال کریر و گوندار کہ دا گام غلط ءِ ۔ اوپارے کہ آئین ءِ اسکول آتیٹی خوانفنگ نا گرج ءِ۔ ہراتم چناک آئین ءِ خوانرہ تو او سمجھرہ کہ ملک انا لغام اوفتا دوٹی ءِ۔ اومستی پارے کہ او تینا ادارہ نا کنڈآن پاننگ خواہک کہ نن آئین نا محافظ اُن، نن غٹ آئین نا دفاع و رکھ انا سوغند ہلکونن، اگہ ای کننگ کپرہ تو کنے آ تنقید مننگ کیک۔
