اسلام آباد۔ 10 اپریل (اے پی پی) پاکستان پیپلزپارٹی نا شریک چیئرمین و مسکوہی صدر آصف علی زرداری پارے کہ کس اسے آئین تون کھلواڑ کننگ نا موکل تفنہ، ہر پڑآ جعلی جمہوریت پسند آتا مقابلہ ءِ کینہ، جعلی جمہوریت پسند آک پرویز مشرف تون پبی تفیسر۔ دوشنبے نادے آئین پاکستان نا گولڈن جوبلی نا وخت آ قومی آئینی کنونشن آن تران کرسا اوپارے کہ تاریخ نا طالب علم اسے نا وڑاٹ اوپاننگ کیک کہ نن جمہوریت ءِ بحال کرین ولے ہرا تغ ءِ ذوالفقار علی بھٹو ، ولی خان، مفتی محمود و اونا سنگت آک خناسر او پورو مننگ کتو۔اوپارے کہ سیاسی سفر اٹ او شیف بڑزی خنانے، ای 14 سال زندان اٹ گدریفینٹ، و غٹ آن زیات تنیائی نا قید کاٹانٹ، کنتون بھاز انگا راز آک ءُ گڑاس نم تون و گڑاس الس تون شیئر کننگ کینہ گڑاس شیئر مننگ کپسہ، نن پاکستان ءِ جوڑ کرینن و پاکستان ءِ بچفنگ نا زمواری ہم ننا ءِ، نن پوسکن آ چین تے پنوک ءُ پاکستان اس تننگ کپنہ ہنداسوب آن کس اسے آئین تون کھلواڑ کننگ نا موکل تفنہ۔ آصف علی زرداری پارے کہ پیپلزپارٹی مدام اسہ ہی نعرہ اس خلکنے کہ ننے پاکستان درکار ءِ، ہراتم بینظیر بھٹو ءِ شہہید کننگا تو ہمووخت آ نن پاکستان کھپے نا نعرہ ءِ خلکن۔
