اسلام آباد۔ 10 اپریل (اے پی پی) پارلیمنٹ نا ہڑتوم آ ایوان تا اسیجائی دیوان اٹی سپریم کورٹ پریکٹس اینڈ پروسیجر بل 2023ء نا گڑاس ترمیم آتون منظوری ءِ تننگا۔ دوشنبے نادے پارلیمنٹ نا اسیجائی دیوان نا بناء آ اسپیکر قومی اسمبلی راجہ پرویز اشرف پارے کہ اینو آئین نا گولڈن جوبلی دود آتا بناءِ کننگانے ہراڑا غٹ باسک آتے مبارکباد پیش کینہ۔ داوخت آ تحریک انصاف نا باسک آک ایوان اٹ شورشرابہ و نعرہ خلنگ نا بناءِ کریر۔ بنجائی وزیر کانود و انصاف اعظم نذیرتارڑ پارے کہ قومی اسمبلی و سینیٹ و ولدا تعلقدار قائمہ کمیٹی بھلو سلابت اسے آن پد سپریم کورٹ پریکٹس اینڈ پروسیجر بل 2023 ء نا منظوری ءِ تسر ہرا دے صدر مملکت ءِ منظوری کن گدریفنگا ولے صدر مملکت دا بل ءِ پارلیمان ءِ تینا کلہو اتون پدی گدریفینے۔ اوایوان اٹی صدر مملکت نا کنڈآن مون تروک آ کلہو ءِ خوانسا بنفے ہرانا رداٹ آرٹیکل 67 نا رداٹ پارلیمان ءِ آئین نا تابع رہینگسا تینا وڑوڈول و کاروبار ءِ منظم کننگ کن قاعدہ اس جوڑ کننگ نا اختیار دوئی ءِ، آرٹیکل 191 نا رداٹ آئین و کانود نا تابع رہینگسا سپریم کورٹ تینا کارروائی و وڑوڈول ءِ ریگولیٹ کننگ نا قاعدہ جوڑ کننگ کیک، آرٹیکل 67 و 191 قاعدہ جوڑ کننگ اٹ ہڑتوم آ تا وتواجہی ءِ امنا کیرہ، عدلیہ نا آجوئی ءِ رکھ تننگ کن آرٹیکل 191 ءِ دستور اٹ اوار کننگا، دا آرٹیکل نا رداٹ سپریم کورٹ ءِ پارلیمنٹ نا کانود سازی نا واکداری آن پیشن تخنگانے، آرٹیکل 70 بنجائی کانود سازی نا فہرست اٹ اوار ہر باندات آکانود اس جوڑ کننگ کیک، فورتھ شیڈول نا رداٹ پارلیمنٹ ءِ سپریم کورٹ آن بیدس غٹ عدالت آتا دائرہ اختیار و واکداری تا بابت کانود سازی نا اختیار ارے، بل بنداوی وڑاٹ پارلیمنٹ نا دائرہ اختیار آن پیشن ءِ، دا پلو آتا جوان سجفنگ نا گرج ءِ۔
