مسکوہی صدر آصف علی زرداری نا آئین نا گولڈن جوبلی نا وخت آ قوم ءِمبارکباد

اسلام آباد۔ 10 اپریل (اے پی پی) مسکوہی  صدر مملکت آصف علی زرداری 1973 نا آئین ناگولڈن جوبلی نا وخت آ قوم ءِ مبارکبادی ترسا پارینے کہ آئین نا رکھ اکن ہروڑنا قربانی ایتنہ۔ اوپارے کہ قائد الس ذوالفقار علی بھٹو شہید 1973 نا آئین نا دروشم اٹ قوم ءِ ٹیکی اس تسوسس۔ 1973 نا آئین امنائی دستور ءِ ہراڑا قومی اسمبلی نا غٹ باسک آتا دستخط ءِ۔ آصف علی زرداری پارے کہ 1973 نا دستور آ قومی اسمبلی ٹی ساڑی غٹ باسک آک ہرافتا تعلق چندی سیاسی و مذہبی جماعت آتیان ئسک، اوآئین آن امنا کرسا اوڑا دستخط کریسر۔ اوپارے کہ پیپلزپارٹی پارلیمنٹیرینز 1973 نا آئین آ دستخط کروک آ غٹ سیاست دان تے خراج عقیدت پیش کیک۔ اوپارے کہ ’’نن پیپلزپارٹی نا غٹ ہیروتے سلام پیش کینہ ہرافک لمہ جمہوریت بیگم نصرت بھٹو و گودی بینظیر بھٹو شہید نا کماشی ٹی آئین نا بحالی کن عظیم قربانی تسنو‘‘۔ اوپارے کہ آمریت نا تہار دور اٹی پیپلزپارٹی نا جیالہ غاک تینا دتر اٹ چراغ ءِ لگفسا جمہوریت کن جہد کروک آتے کسر نشان تسر۔ غٹ سیاسی کارندہ غاتے خراج عقیدت پیش کینہ ہرافک آئین و جمہوریت نا خاطر پاہو تے امنا کریر ، تینا پُٹی آ کوڑاغاتے سگار و بندی کاٹار۔مسکوہی صدر پارے کہ 1973 نا آئین نا اصل دروشم اٹ بحالی بینظیر بھٹو شہید نا زند انا اولی مسخت ئسک واکدار پارلیمنٹ بحال مس۔ الحمداللہ۔ ہژدہ می آئینی ترمیم نا کمک اٹ 1973 نا آئین اصل دروشم اٹ بحال مسنے۔