کوئٹہ۔ 10 اپریل (اے پی پی) ڈائریکٹر جنرل کھیل دُرابلوچ پارینے کہ بلوچستان نا ورناتیٹی مثبت و جان جوڑ سرجزآتا کنڈآ دننگ کن کوشست کننگ اٹی اُن، اسپورٹس نا مون آدننگ حکومت بلوچستان نا اولیت آتیٹی اوار ءِ، روچہ مبارک اسپورٹس فیسٹیول اٹی ٹیپ بال کرکٹ، ہاکی، فٹسال تون اوار ایلو گوازی تا مقابلہ مریک۔ داخیال آتا درشانی ءِ او محکمہ گوازی حکومت بلوچستان نا کنڈآن روچہ مبارک اسپورٹس فیسٹیول نا چرجوئی ٹی ٹیپ بال کرکٹ ٹورنامنٹ نا بنا نا وخت آ تینا تران اٹی کرے اوپارے کہ ٹیپ بال کرکٹ نا گوازی گرآتون آل کوئٹہ روچہ مبارک ٹیپ بال کرکٹ نائٹ کپ اس اصڈتننگ نا ہرا قول ءِ کریسن اودے نن پورو کرین ننا کوشست ءِ کہ گوازی گر آتے پلیٹ فارم اس فراوان کننگ کن مون آہم ٹیپ بال کرکٹ ٹورنامنٹ اڈترسا کین تانکہ گوعازی گر آک تینا لائخی تے تالان کننگ کیر، داوخت آ ڈائریکٹر جنرل گوازی دُرابلوچ بیڈ اٹ شارٹ اس خلسا ٹیپ بال کرکٹ ٹورنامنٹ نا باقاعدہ بناءِ کرے، اوڑتون اوار بلوچستان ہینڈ بال ایسوسی ایشن نا صدر شیر محمد ترین، بلوچستان ہاکی ایسوسی ایشن نا صدر امجد ستی، نائب صدر چوہدری شبیر، گل محمد کاکڑ، سہیل احمد خان، محمد قاسم و ایلوفک ساڑی ئسر۔ اوکان پد ٹورنامنٹ نا چرجوئی ٹی بنائی میچ سعد فائٹر و بریوری الیون نا نیام اٹ مس ہراٹی سعد فائٹر بریوری الیون ءِ 40 رنز اٹ شکست تس۔ یات سلے کہ ورناتے مثبت سرجزآتا کنڈآ دننگ کن محکمہ گوازی حکومت بلوچستان نا کنڈآن روچہ مبارک اسپورٹس فیسٹیول نا چرجوئی ٹی چندی گوازی تا مقابلہ اڈتننگانے ہراکہ 17 اپریل اسکان برجاسلک۔
