راولپنڈی۔ 07 اپریل (اے پی پی) سیکورٹی فورس آک سرسہب آپریشن اٹی کالعدم بلوچ نیشنل آرمی نا بانی و بے کچ درکار دہشت گرد گلزار امام ءِ دزگیر کرے، اونا دشمن انٹیلی جنس ایجنسی تتون رابطہ غاتا چھان بین ءِ کننگ انگ ءِ۔ آئی ایس پی آر نا رداٹ سیکورٹی فورس آک انٹیلی جنس بیسڈ آپریشن اٹی ہائی ویلیو ٹارگٹ گلزار امام عرف شمبے ءِ دزگیر کرے، گلزار امام عسکریت پسند کالعدم تنظیم بلوچ نیشنل آرمی نا بانی و راہشون ءِ۔ بی این اے ، بلوچ ریپبلکن آرمی و یونائیٹڈ بلوچ آرمی نا انضمام آن جوڑ مسوسس، بلوچ نیشنل آرمی پنجگور و نوشکی ٹی کانود نافذ کروک آ ادارہ غاتیا جلہو آتیٹی اوارءِ۔ بلو چ نیشنل آرمی پاکستان اٹی چندی دہشت گرد جلہو آتا زموار ءِ، گلزار امام 2018 اسکان بلوچ ریپبلکن آرمی ٹی براہمداغ بگٹی نا نائب ہم رہینگا۔ گلزار امام بلوچ راجی آجوئی سانگر ناجوڑ کننگ اٹ ہم اہم ءُ کڑد اس ادا کرساکرے، او بلوچ راجی آجوئی سانگر نا آپریشنل سروک ہم رہینگا، گلزار امام نا اوغانستان و بھارت نا دورہ ہم ریکارڈ آٹی ءِ۔ اونا دزگیری بی این اے و ایلو عسکریت پسند گروپ آتیکن بھلو دھچکاسے، اونا دشمن انٹیلی جنس ایجنسی تتون رابطہ غاتا چھان بین ءِ کننگ انگ ءِ۔ یات سلے کہ گلزار امام عرف شنبے 1978 اٹی بلوچستان نا ضلع پنجگور اٹی پروم نا ہند آ ودی مس۔ 2009 اسکان ٹھیکیدار و نیوز رپورٹر نا ملازمت کرے۔ 2018 اسکان کالعدم بلوچ ریپبلکن آرمی ٹی براہمداغ بگٹی نا نائب رہینگا۔ گلزار امام 11 جنوری 2022 آ بلوچ ریپبلکن آرمی و یونائیٹڈبلو چ آرمی نا انضمام اٹی جوڑ مروک آ بلوچ نیشنلسٹ آرمی نا سروک گچین مس۔ نومبر 2018 اٹی 4 کالعدم تنظیم تا انضمام آن جوڑ مروک آ بلوچ راجی آجوئی سنگر پنی ءُ تنظیم اسے نا ٹہفینگ اٹ اہم ءُ کڑد اس ادا کرے۔ آزاد بلوچستان نا تحریک اٹی دشمن انٹیلی جنس ایجنسی تا اصل عزم آشکار مس۔ دسمبر 2017 اٹی گل نوید نا پن اٹ اوغانی پاسپورٹ آ بھارت نا دورہ ءِ ہم کرے۔ انٹیلی جنس ادارہ غاک پدریسہ سخت کوشست آتیان پد گلزار امام عرف شنبے ءِ بلوچستان آن دزگیر کرے۔ دزگیری کالعدم تنظیم و دشمن انٹیلی جنس ایجنسی تا ناپاک عزم آتیکن اسہ بھلو دھچکاسے۔
