قومی اسمبلی ، سی ڈی اے ءِ اسلام آباد اٹی جنگلی شہتوت نا جاگہ غا میوہ دار چاگڑد دوست نیال خلنگ نا پارت

اسلام آباد۔ 06 اپریل (اے پی پی) بنجائی وزیر پارلیمانی امور مرتضیٰ جاوید عباسی قومی اسمبلی ءِ پارے کہ بنجائی دارالحکومت اٹی پولن الرجی نا سوب جوڑ مروک آ جنگلی شہتوت آتا جاگہ غا میوہ دار و چاگڑد دوست نیال خلنگ نا سی ڈی اے ءِ پارت کننگانے۔ پنچ شنبے نادے آ قومی اسمبلی ٹی وقفہ سوج آتیٹی شیخ روحیل اصغر نا سوج انا ورندی ٹی وزیر پارلیمانی امور مرتضیٰ جاوید عباسی پارے کہ جنگلی شہتوت الرجی نا سوب جوڑ مریک، دانا چٹفنگ کن گام گیج کننگ انگ ءِ۔ سی ڈی اے ءِ اینو ہی پارت جاری کننگک کہ اوفتا جاگہ غا چاگڑددوست و میوہ دار درخت خلنگے۔ شمیم آراء پنہور نا سوج انا ورندی ٹی  وزیر پارلیمانی امور مرتضیٰ جاوید عباسی پارے کہ ڈھوکری چوک آن سترہ میل چوک اسکان شاہراہ نا خیالداری ءِ این ایچ اے کیک، سی ڈی اے نا داٹی ہچ ءُ کڑد اس اف، اونا کل مرغنی 57 کلومیٹر ءِ۔ مولانا عبدالاکبر چترالی نا سوج انا ورندی ٹی مرتضیٰ جاوید عباسی  پارے کہ اسلام آباد اٹی ڈوہ انا کچ اٹی کمتی بننگ ءِ دا ننا دارالخلاقہ و پاکستان نا دروشم ءِ داڑے امن و ایمنی گچین مننگ آن ملک انا ایلو بشخ آتے جوان ءُ کلہو اس کاہک۔ داڑے مچ آ ملک آن مخلوق بریک۔ اوپارے کہ اسلام آباد پولیس نا کارکڑد است جم ءِ ولے دادے پین گچین کننگ نا گرجءِ ، اسلام آباد پولیس ءِ ڈوہ انا توننگ کن پوسکن آ ازباب آتیان شپ کننگ نا بابت سلاہ غا کاریم مننگ ءِ۔