کوئٹہ۔ 06 اپریل (اے پی پی) پارلیمانی سیکرٹری اقلیتی امور خلیل جارج پارینے کہ بلوچستان نا گوازی گرآتیٹی ٹیلنٹ نا ہچ ءُ کمتی اس اف، اگہ اوفتے جوان وارخواہی فراوان کننگے تو دا گوازی گر آک نئے بیرہ پاکستان بلکن پیشن نا ملک اٹی ہم بلوچستان نا پن ءِ روشنا کننگ کیرہ، صوبائی حکومت ورناتے جان جوڑ سرجز و گوازی تا آسراتی نا فراوانی کن غٹ دوئی وسیلہ غاتے کاریم اٹ اتنگ اٹی ءِ۔ داخیال آتا درشانی ءِ او کوئٹہ پریس کلب اٹی مدرٹریسا میموریل سوشل سوسائٹی نا کنڈآن اقلیت آن تعلق تخوک آ گوازی گرآتیٹی کٹ و گوازی تا گڑا بشخنگ نا دود آن تران کرسا کرے۔ پارلیمانی سیکرٹری خلیل جارج پارے کہ صوبائی حکومت وزیراعلیٰ بلوچستان میر عبدالقدوس بزنجو نا کماشی ٹی ورناتے گوازی تا گچین وارخواہی تا فراوانی کن غٹ دوئی وسیلہ غاتے کاریم اٹ اتنگ اٹی ءِ 34 می نیشنل گیمز انا بلوچستان اٹی اڈتننگ ہم ہندا چرجوئی نا کڑی اسے۔ اوپارے کہ بلوچستان نا گوازی گرآتیٹی ٹیلنٹ نا ہچ ءُ کمتی اس اف گوازی گر آتے اگہ گوازی تا جوان ءُ وارخواہی فراوان کننگے تو دا بلوچستان نا پن ءِ روشنا کننگ کیرہ۔ اوپارے کہ اینو مدر ٹریسا میموریل سوشل سوسائٹی نا کنڈآن اقلیت آن تعلق تخوک آ ٹیم تیٹی گوازی تا گڑا بشخنگ انگ ءِ انتئے کہ گوازی گر آک غریب آاُراتیان تعلق تخنگ نا سوب آن گڑا ہلنگ کپسہ۔ اوپارے کہ ورناتے ہم مرے کہ او منفی سرجز آتیان مر مریر و گوازی تا مقابلہ غاتیٹی زیات آن زیات بشخ ہلیر انتئے کہ گوازی تا کمک اٹ ورناتے راجی گندہ ئی تیان مُر تخنگ مریک۔
