اسلام آباد۔ 05 اپریل (اے پی پی) اسپیکر قومی اسمبلی راجہ پرویز اشرف سندھ انا کیڈٹ کالج اٹی ملازم آتے کم آن کم اجرت 25 ہزار روپئی نا مقابلہ ٹی 18 ہزار روپئی نا حساب اٹ تنخواہ تا ادائیگی تون تعلقدار سوج تعلقدار کمیٹی نا حوالہ کرسا وزارت خزانہ ءِ پارت کرینے کہ غٹ ادارہ غاتیٹی کم آن کم اجرت 25 ہزار روپئی نا رداٹ تنخواہ تا ادائیگی نا سرجم آتے دوئی کرسا ایوان ءِ معلومدار کننگے۔ چارشنبے نادے آ قومی اسمبلی ٹی وقفہ سوج آتیٹی آغا رفیع اللہ پارے کہ سندھ انا اسہ کیڈٹ کالج اسے ٹی داسکان ملازم آتے ہژدہ ہژدہ ہزار روپئی تنخواہ تننگ انگ ءِ، کم آن کم 25 ہزار نا اجرت نا ادائیگی ءِ پک کننگے۔ اسپیکر دا بابت رولنگ ایتے۔ اسپیکر وزارت خزانہ ءِ پارت کرے کہ غٹ ادارہ غاتیان دا بابت رپورٹ ہلنگے کہ کم آن کم اجرت نا ادائیگی آ عمل ہراحداسکان مننگ ءِ۔اسپیکر پارے کہ دا حاجی عبدالکریم بجار نا سوج ء، ہرا دے تعلقدار کمیٹی نا حوالہ کننگے۔ وزیر مملکت خزانہ عائشہ غوث پاشا پارے کہ کم آن کم اجرت نا باندات صوبہ غاتا ماتحت بریک۔ اسپیکر پارے کہ بنجائی دارالحکومت نا حد اسکان کم آن کم اجرت آ عملدرآمد ءِ پک کننگے۔ مولانا عبدالاکبر چترالی پارے کہ بنجائی دارالحکومت نا تعلیمی ادارہ غاتیٹی داسکان ایم فل اسکان تعلیم دوئی کروک آاستاد آتے بیست بیست ہزار روپئی تنخواہ تننگ انگ ءِ، دانا ہم نوٹس ءِ ہلنگے۔ وزیر مملکت خزانہ ڈاکٹر عائشہ غوث پاشا پارے کہ تعلیمی ادارہ غاتیٹی تنخواہ تا باندات ءِ وزارت تعلیم نا کمیٹی نا حوالہ کننگے۔ اسپیکر پارے کہ قائمہ کمیٹی خزانہ ادارہ غاتے بٹنگسا باز پرس کننگ کیک۔
