اسلام آباد۔ 05 اپریل (اے پی پی) بنجائی وزیرداخلہ رانا ثناء اللہ خان پارینے کہ ساڑی آ حالیت آتیٹی جھیڑہ ئی گچین کاری تا اڈتننگ ملک ءِ ہڑدڑ و بے چیٹی نا کنڈا دیک، ساڑی حکومت ہندانامون آ اڑاند جوڑ مرسا سلوک ءِ، گچین کاریک غٹ فریق آتا مرضی و امنائی سلاہ اٹ بایدے مریر۔ او چارشنبےنادے آ جوڈیشل کمپلیکس اٹی وکلاکنونشن آن تران کریکہ۔ بنجائی وزیر کانود و انصاف سینیٹر اعظم نذیر تارڑ ، بنجائی وزیر حوالکاری و شینکاری مریم اورنگزیب ، وزیراعظم نا خصوصی کمکار عطاتارڑ و ن لیگی سرکڑدہ غاک ہم داوخت آ ساڑی ئسر۔ وکلاکنونشن نامہمان خاص پاکستان مسلم لیگ ن نا سینئر نائب صدر و چیف آرگنائزر مریم نواز ئسک۔ بنجائی وزیر رانا ثناء اللہ خان پارے کہ اینو دا عظیم و الشان وکلاکنوونشن نا اڈتننگ آ مسلم لیگ ن لائر فورم ءِ مبارکبادی ایتیوہ، پاکستان مسلم لیگ ن اسہ سیاسی ءُ جماعت اسے نا وڑاٹ ساڑی آ دور اٹی اسہ پیدوار نظریہ و پالیسی اس تخک۔ اوپارے کہ وکیل آک مدام قوم انا راہشونی ءِ کرسا قومءِ سہی ءُ کسر اس نشان تسنے۔ اوپارے کہ جھیڑہ ئی انداز اٹ گچین کاری کرفنگ ناکوشست کننگ انگ ء،، پاننگ انگ ءِ کہ نن گچین کاری تیان پدی مننگ اُن۔ نن اوفتے پاننگ خوانہ کہ گچین کاری تیان خلوک ءُ افن، نن بھاز انگا گچین کاری تیٹی بشخ ہلکن و مدام گچین مرسا بسونن نئے کہ سلیکشن اٹ۔ اوپارے کہ سیاسی جماعت، سپریم کورٹ نا جج آتا الیکشن آ امنائی اف ولے مسہ جج پنجاب اٹی 14 مئی ناالیکشن نا پوسکن ءُ شیڈول اس تسنو۔ الیکشن کمیشن ، دفاعی ادارہ، سیکورٹی نا ادارہ غاتے داڑآن اتفاق اف، و چار جج دانابرخلاف و مسٹ حق اٹی فیصلہ تننگ اٹی ءُ۔ ننا سلاہ ءِ کہ داوڑنا جھیڑہ ئی گچین کاری ملک ءِ ہڑدڑ و بے چیٹی نا کنڈادیک۔ داکان مست 1971 نا گچین کاریک ملک ءِ اِراٹکرکریر و 1977نا گچین کاری ہم جھیڑہ ئی ئسر اوکان پد ملک اٹی کلاشنکوف کلچر بس اوکان پد نن اینو اسکان دہشت گردی آن نجات دوئی کننگ کتنون اگہ دا مسٹ میکو گچین کاری جھیڑہ ئی مس تو بھسکاری نا سوب جوڑ مریک۔ نن دا بھسکاری نا کسر نا مون آاڑاند اُن۔ وزیرداخلہ پارےکہ ننا سلاہ نا سپریم کورٹ نا جج آتا گیشتری، بارکونسل توثیق ءِ کیر ہ۔ اوپارے کہ فتنہ خان وخت اس لانگ مارچ، وخت اس اسلام آباد آ جلہو و وخت اس اسمبلی تے پرغک، تینا ضد آن گچین کاری کرفنگ خواہک بیرہ تینا ضد اکن دا غٹ ءِ کننگ ءِ۔
