صوبائی محتسب السی پت ءِ برقرار تخنگ کن تینا فیصلہ غاتیا وخت آ عملدرآمد ءِ پک کے، صدر مملکت ڈاکٹر عارف علوی

اسلام آباد۔ 04 اپریل (اے پی پی) صدر مملکت ڈاکٹر عارف علوی  سرکاری ادارہ غاتا  بد انتظامی نا برخلاف السی غاوتا دمدستی ازالہ نا گرج آ زور شاغسا پارینے کہ صوبائی محتسب السی پت ءِ برقرار تخنگ کن تیان فیصلہ غاتیا وخت آعملدرآمدءِ پک کے۔ ایوان صدر نا پریس ونگ آن جاری بیان نا رداٹ صدر مملکت داخیال آتا درشانی ءِ صوبائی محتسب بلوچستان نذرمحمد بلوچ تون گپ وتران اٹی کرے ہرا سے شنبے نادے آ اوڑتون داڑے ایوان صدر اٹی اوڑدہی کرے۔ داوخت آ صوبائی محتسب بلوچستان صدر مملکت ءِ ادار ہ نا رپورٹ سال 2021ءِ پیش کرے ۔ صدر پارے کہ سرکاری ادارہ غاتا بد انتظامی نا برخلاف السی غاوتا دمدستی پوروی المی ءِ، بنجائی و صوبائی محتسب آک انصاف نا فراوانی ٹی اہم ءُ کڑد اس ادا کیرہ۔ ڈاکٹر عارف علوی پارے کہ محتسب آتا خذمت زیات مخلوق اسکان سرکننگ کن اوفتے سوگو کننگ المی ءِ، مخلوق ءِ اوفتا درگہ غاانصاف نا فراوانی کن محتسب نا رسینگ ءِ مر مر علاقہ غاتسکان ودفنگے۔ صدر مملکت پارے کہ صوبائی محتسب السی پت ءِ برقرار تخنگ کن تینا فیصلہ غاتیا وخت آ عملدرآمد ءِ پک کے، بلوچستان نا الس ءِ محتسب نا کڑد انابارواٹی آگاہی تننگ کن گچین آگاہی مہم اس بناکننگے۔ اوڑدہی ٹی ہمووخت آ صوبائی محتسب صدر مملکت ءِ 2021اٹی ادارہ نا کڑد وکارکڑد نا بارواٹی پارے۔ اوپارے کہ اونا چارج ءِ سنبھالنگ آن پد رجسٹرڈ غاوتا کچ اِرا ہنداخہ مس۔ صوبائی محتسب بلوچستان پارے کہ صوبائی محتسب ءِ 2021اٹی 1321 غاو دوئی مس ہرافتیان 1043 غاوتا ازالہ ءِ کننگا۔ اوپارے کہ زیات تر غاو تعلیم و جان جوڑی نا محکمہ غاتا بابت ئسر۔ نذر محمد بلوچ پارے کہ بلوچستان نا 7 جتا ضلع غاتیٹی السی آسراتی کن کھلی کچہری ہم اڈتننگا۔