حکومت، جدت، ٹیکنالوجی و ڈیجیٹل تعلیم نا رداٹ صنفی رداٹ زموارانہ سوچ ودی کننگ نا غرض اٹ قومی لائحہ عمل اس تیار کے، سینیٹ اٹی امنائی قرارداد منظور

اسلام آباد۔ 03 اپریل (اے پی پی) سینیٹ اسہ قرارداد اس امنائی وڑاٹ منظور کرینے ہراٹی پاننگانے کہ حکومت جدت، ٹیکنالوجی و ڈیجیٹل تعلیم نا رداٹ صنفی رداٹ زموارانہ سوچ ودی کننگ نا غرض اٹ قومی لائحہ عمل اس تیار کے و دادے عملی دروشم اس ایتے، زالبول و مسن تے ڈیجیٹل مہارت آتیان شپ کننگے۔ دوشنبے نادے آ سینیٹ نا دیوان اٹی سینیٹر سیمی ایزدی دا قرارداد ءِ ایوان اٹ پیش کرے۔ قرارداد اٹی پاننگانے کہ 8 مارچ 2023 آ زالبول آتا جہانی دے انا مسخت تعصب، دقیانوسی تصور و امتیازی برتاؤ ان پاک دنیا نا تخلیق و توثیق ءِ۔ اقوام متحدہ نا 8 مارچ 2023 نا سرحال بعنوان ’’ڈیجیٹ آل : جدت و ٹیکنالوجی صنفی مساوات ‘‘ درک ءِ تخسا چندی بشخ خاص وڑاٹ شعبہ ٹیکنالوجی و آن لائن تعلیم اٹی مسن و زالبول آتا بشخ ہلنگ آ جشن اڈتننگ، ودوک آ زرگزرانی و راجی بے آواری تیا ڈیجیٹل صنفی خلا نا اثرآتا اعتراف ءِ کننگ و ڈیجیٹل سپیسز اٹی زالبول و مسن تا حق انا رکھ انا اہمیت ءِ امنا کرسا و آن لائن و انفارمیشن و کمیونیکیشن ٹیکنالوجی نا کمک اٹ کروک آ منفی بیدادی نا ویل  ءِ ایسر کرسا داہیت ءِ امنا کننگانے کہ زالبول و ایلو محروم تپہ غاتے ٹیکنالوجی آن آراستہ کننگ نا نتیجہ اوفتا ویل آتا گچین ایسر نا دروشم اٹ پیش تمک و زالبول آتا گرج آتے پورو کننگ و صنفی بریبری نا مون آ دننگ اٹ پوسکن آ گمان تے روشنا کیک۔ قرارداد اٹی پاننگانے بابائے قوم قائد اعظم محمد علی جناح نا فرمان آ خوشی نا درشانی ءِ کرسا پارے کہ ’’دنیا ٹی اِراواکدار ءُ ، اسٹ تلوار و ارٹ میکو قلم ءِ و ہڑتوم آتیٹی پبی مقابلہ و رقابت برجا سلیسنے، داہڑتوم آتیان واکدار اسہ مسٹ میکو قوت اس ہم ارے و او زالبول ءِ۔ قرارداد اٹی داہم پاننگانے کہ حکومت جدت، ٹیکنالوجی و ڈیجیٹل تعلیم نا رداٹ صنفی لحاظ اٹ زموارانہ سوچ ودی کننگ نا غرض اٹ قومی لائحہ عمل اس تیار کے و اودے عملی دروشم اس ایتے و حکومت زالبول آتے ڈیجیٹل حق فراوان کننگ کن پی ایس ڈی پی ڈٹ آتا کمک اٹ جتا فنڈ مختص و انفارمیشن کمیونیکیشن ٹیکنالوجی نا بشخ اٹی تعلیم ءِ اولیت ترسا زالبول و مسن تے ڈیجیٹل مہارت آتیان شپ کے۔