اسلام آباد۔ 03 اپریل (اے پی پی) صدر ریاست آزاد کشمیر بیرسٹر سلطان محمود چوہدری پارے کہ آزاد کشمیر اٹی بلدیاتی گچین کاری تا سرسہب اڈتننگ آن پد اقتدار حقی وڑاٹ شیفکو کہول آ منتقل مسنے۔ ای ہراتم صدر ریاست نا عہدہ نا سوغند ہرفیٹ تو ای الس تون مسہ قول کریسٹ ہرافتے ٹی ارٹ پورو مسنو، اسہ ویل کشمیر ءِ آجوئی نا بیس کیمپ آن جارحانہ وڑاٹ جہانی کہول آ تالان کننگ، ارٹ میکو بلدیاتی گچین کاری تا اڈتننگ ئسک۔ داخیال آتا درشانی ءِ صدر ریاست آزاد کشمیر بیرسٹر سلطان محمود چوہدری حلقہ کھڑی شریف اٹی چیئرمین ضلع کونسل راجہ نوید اختر گوگانا ہنکین آ اڈ ہلوک افطار ڈنر نا مچی آن بطور مہمان خاص تران اٹی کرے۔ اوپارے کہ بلدیاتی گچین کاری تیٹی راجہ نویداختر گوگا ضلع میر پور آن بے مقابلہ غان چیئرمین ضلع کونسل گچین مسنے دا آزاد کشمیر نا بلدیاتی گچین کاری تا تاریخ اٹی اولیکو وار مسنے۔ داڑا ای راجہ نوید اختر گوگا ءِمبارکبادی ایتیوہ ا ومیت کیوہ کہ او السی اومیت آتیا پورو سلک۔ آزاد کشمیر اٹی 32 سال آن پد بلدیاتی گچین کاری تا انعقاد مسنے دا الس نا متکن آ خواست ئسک ای سمجھیوہ کہ اقتدار نا شیفکو کہول آ گدریفنگ آن بیدس آزاد کشمیر اٹی حقی بدلی اتنگ ممکن الوکہ داسہ بلدیاتی گچین کاری تیان پد السی نمائندہ غاتے اقتدار منتقل مسنے انشا ء اللہ بروک آ دے تیٹی الس دانا بھرم تیان فائدہ ہرفک۔
