اسلام آباد۔ 20 مئی (اے پی پی) سلاہکار خارجہ سرتاج عزیز پارینے کہ بھارتی جاسوس کلبھوشن یادیو نا کیس اٹی پاکستان غٹ کانودی گرج آتے پورو کرینے، ملکی کانود نا رداٹ جہانی عدالت انصاف سزائے موت ئِ توننگ کپک۔ جہانی عدالت انصاف اٹی تینا کیسئِ سوگو وڑاٹ پیش کیک، گرج مس تو اٹارنی جنرل ہم عدالت اٹی پیش مریک۔ جہانی عدالت قونصلر رسینگ کن ہچ ئُ حکم اس جاری کتنے، عبوری فیصلہ غان بھارت نا کٹنگ نا تاثر بے بنداو ئِ ۔ جہانی عدالت کیس انا فیصلہ بننگ اسکان سزائے موت ئِ توننگ ناپارینے، آئی سی جے ٹی تینا ایڈہاک جج تعینات کیک، قومی مفاد نا معاملہ غاتیا بیان بازی بے کچ نامناسب ئِ، سجن جندل نا دورہ جندی وڑنا ئس و دا کیس اتون اونا ہ ہچ ئُ تعلق اس اف، کلبھوشن یادیو نا لمہ نا کنڈآن رحم نا اپیل رسینگانے داڑآ سجفنگک۔ داہیت آتے اوہفتہ نا دے داڑے پریس کانفرنس اٹی ایڈیٹرز و سینئر اینکرز آتا چندی سوج آتا ورندی ئِ ترسا پارے۔ سرتاج عزیز پارے کہ پاکستان اقوام متحدہ نا اسہ زموار ئُ باسک اسے ، کلبھوشن یادیو نا معاملہ ٹی پورو صلابت آن پد نن جہانی عدالت انصاف آ ہنان، ننتون بیرہ پنچ دے ئسر، داخہ کم وخت اٹی ایڈ ہاک جج خلنگ ننکن ممکن ہلوکہ۔اوپارے کہ خاور قریشی ئِ وکیل تعینات کننگ نا فیصلہ متفقہ ئس، اونادلیل نا غٹ ستائِ کرینو، ننا وکیل مدلل وڑاٹ پاکستان نا کیس پیش کرے۔ سلاہکار خارجہ پارے کہ داہیت پاننگ انگ ئِ کہ آئی سی جے ٹی ننتون 90 منٹ ئسر و نن 50 منٹ ئِ کاریم اٹ ایسون، دابے کچ غلط ئُ تاثر اسے۔
