بنجائی محتسب نا فیصلہ برقرار، صدر مملکت نا بین الاقوامی اسلامی یونیورسٹی نا ریٹائرڈ پروفیسرءِ پنشن نا حصہ ءِ ادا کننگ نا پرمان

اسلام آباد۔ 30 مارچ (اے پی پی) صدر مملکت ڈاکٹر عارف علوی یونیورسٹی نا ریٹائرڈ پروفیسر نا پنشن نا بابت بنجائی محتسب نا فیصلہ ءِ برقرار تخسا بین الاقوامی اسلامی یونیورسٹی ٹی 14 سال اسکان خذمت سرتروک آ پروفیسر ءِ سپریم کورٹ انا فیصلہ ءِ مون آ تخسا پیشن نا حصہ اس ادا کننگ نا پرمان کرے۔ صدر مملکت گوندا کہ پنشن انعام اس اف بلکن مرغن و پدریسہ خذمت آتیان دوئی کننگک۔ ایوان صدر نا پریس ونگ انا رداٹ صدر مملکت ڈاکٹر عارف علوی سماعت اٹی یونیورسٹی پروفیسر نا دعویٰ ءِ امنا کرے و ازالہ نا باوری کرفے۔ صدر مملکت پارے کہ کانود آن اینک پنشن  نا حق آن محرومی یا تاخیر نا موکل تننگ مفک۔ پنشن خواری اٹ کٹوک آ حق ءِ ہرا ملازم ءِ دوئی مریک۔ صدر مملکت فیصلہ ٹی سپریم کورٹ نا 2013 نا فیصلہ نا ہم حوالہ ءِ تس۔ فیصلہ ٹی سرکاری محکمہ و آفیسر آتے پنشنری/ریٹائرمنٹ فائدہ غاتے گڈیکو دروشم اس تننگ اٹ بے گرج تاخیر ودی کپننگ نا پارت کننگاسس۔ فیصلہ ٹی پاننگاسس کہ ہروڑنا خلاف ورزی مجرمانہ ڈیوالئی و فرض اتون غفلت آنبار مریک ۔ فیصلہ ٹی پاننگاسس کہ پنشن باندات آتیٹی تاخیر عدالتی نوٹس آ بننگ آ تعلقدار محکمہ نا سروک ءِ توہین عدالت نا زموار گوندنگک۔ صدر مملکت پارے کہ یونیورسٹی تون پدی مننگ نا ہچ ءُ کانودی یا اخلاقی جواز اف، انٹرنیشنل اسلامک یونیورسٹی اسلام آباد محتسب نافیصلہ نا تعمیل ءِ کے ۔ پروفیسر ڈاکٹر علی اصغر چشتی بین الاقومی اسلامی یونیورسٹی ٹی 14 سال بطور فیکلٹی ممبر خذمت سرتسوسس، پروفیسر چشتی کانود و قول انا رداٹ علامہ اقبال اوپن یونیورسٹی ٹی ملازمت اختیار کرے۔ 2020 ء ٹی علامہ اقبال یونیورسٹی آن ریٹائرمنٹ آ مسکوہی یونیورسٹی تون پنشن ءِ شیئر کننگ نا گدریفنگ نا درخواست کرے۔ یونیورسٹی نا کنڈآن پروفیسرنا حق اٹی چٹھی اس جاری مننگ آن پد ہم پنشن ءِ منتقل کننگتو۔ انصاف کن پروفیسر بنجائی محتسب تون رجوع کرے، ہرا پروفیسر نا حق اٹی فیصلہ تس۔ یونیورسٹی پرمان تا برخلاف صدر ءِ درخواست دائر کرے، ہرادے مسترد کننگا۔ صدر مملکت سپریم کورٹ نا فیصلہ ءِ مون آتخسا پنشن ءِ ادا کننگ نا پارت کرینے۔