چندی سوب آتا بنداو آ برآمدات زہمی مس، برآمدی صنعت تون وابستہ ویل آتے اولیتی بنداو تیا ایسر کننگک، سید نوید قمر

اسلام آباد ۔ 30 مارچ (اے پی پی) بنجائی وزیر واپار سید نوید قمر پارینے کہ چندی سوب آتا بنداو آ برآمدآک زہمی مسنو، برآمدی صنعت تون وابستہ ویل آتے اولیتی بنداو تیا ایسر کننگک۔ پنچ شنبے نادے آ سینیٹ نا دیوان اٹی سینیٹرز کہدیٰ بابر، محسن عزیز و دلاور خان نا سوج انا ورندی ٹی اوپارے کہ ملک اٹی کنوئی آ گڑاتا ہچ ءُ کاختی اس اف ، کینو، امب وایلو میوہ و سوزی تے برآمد کننگک، کشاری مصنوعات درآمد کننگک، اوفتا برآمد آتیٹی پین ودکی مریک۔ اوپارے  کہ آئی ایم ایف نا شڑت ءِ کہ صنعتی برآمدی بشخ آ سبسڈی تننگپ۔ دنیا ٹی کساد بازاری بسنے، بجلی و نہاد آتیٹی رعایت ءِ پدی ہلوئی تمانے ہراڑان برآمد آک زہمی مسنو۔ بنجائی وزیر پارے کہ برآمدی صنعت زرمبادلہ نا دوئی کننگ اٹ اہم کڑد ادا کننگ ءِ، داصنعت تون وابستہ ویل آتے اولیتی بنداو تیا ایسر کننگک۔