اسلام آباد۔ 29 مارچ (اے پی پی) بنجائی وزیر داخلہ رانا ثناء اللہ خان اومیت ظاہر کرے کہ عدلیہ ٹی اصلاحات نا کانود سازی اینو پورو مریک، کانو د و آئین اٹی سقم ءِ مر کننگ پارلیمنٹ نا زمواری ءِ، انصاف نا خواست آتے پورو کننگ کن فل کورٹ اس ٹہیفنگے، غٹ کانود ناحکمرانی ٹی کڑد ادا کیر، فتنہ خان ملک اٹی بے چیٹی و لاکانودیت تالان کننگ خواہک، ہراتم میدان لگک تو سماتمک ہراسٹ اخس پنی ءِ۔ او چارشنبے نادے آ داڑے بنجائی وزیر مذہبی امور مفتی عبدالشکور و جے یو آئی نا سیکرٹری جنرل مولانا عبدالغفور حیدری تون اوار میڈیا تون گپ وتران کریکہ۔ بنجائی وزیر داخلہ رانا ثناء اللہ خان پارے کہ نن عدالت عظمیٰ آن انصاف خوانہ، نن خوانہ کہ ملکی سیاست اٹ رواداری ، کانود ناحکمرانی و آئین نا حکمرانی ٹی عدالت عظمیٰ تینا کڑد ءِ ادا کے، دا کڑدآن ہم بریبری بریک، داکان مست بدبختی اٹ ہندن ءُ فیصلہ مرسا کرینے ہرافتیا شک و شبہ کننگانے۔ اوپارے کہ اسہ فیصلہ اس مسنے دا مسٹ، ارٹ نا فیصلہ ءِ ، یاچار، مسٹ نا، دا ابہام بایدے مر مرے۔ دا ابہام ءِ لارجر بنچ یا فل کورٹ ہی مر کننگ کیک ، ہندا خواست ننا کنڈآن ہم مسنے۔ اوپارے کہ اینو ہم ننا خواست ءِ کہ دا ازخود نوٹس ءِ ہرادے مہالو 9 ولدا 7 و ولدا 5 جج سماعت سماعت کرسا کرینو، اودے داسہ ہم فل کورٹ نا کنڈآ دننگے تو دا باندات جوانی اٹ ایسر مننگ کیک۔ اوپارے کہ الیکشن کمیشن ءِ اختیار دوئی ءِ کہ او الیکشن نا تاریخ ءِ ودفے، ہندن الیکشن کرفنگ نا کوشست کننگ انگ ءِ، داوڑ اسٹ اس ہم الیکشن تے منپک۔ جے یو آئی نا سیکرٹری جنرل مولانا عبدالغفور حیدری پارے کہ انصاف نا خواست آتے پورو کننگ کن فل کورٹ اس ٹہیفنگے۔ اوپارے کہ ہراتم آن پارلیمنٹ جوڑ مسنے ہندا بنسا بسونن کہ پارلیمنٹ غٹ آن بھلا ادارہ ءِ، کانود سازی پارلیمنٹ نا زمواری ءِ ، منتظمین کانود آعملدرآمد کرفرہ ۔
