اسلام آباد۔ 29 مارچ (اے پی پی) پاکستان و ملائیشیا نا نیام اٹ ہڑتوم آ کنڈآتا سیاسی سلابت نا ارٹ میکو دور کوالالمپور اٹی اڈ ہلک۔ دفترخارجہ نا ترجمان نا کنڈآن چارشنبے نادے آ جاری بیان نا رداٹ مذاکرات نا اسیجائی کماشی ءِ ایڈیشنل فارن سیکرٹری (ایشیاو پیسفک) ممتاز زہرہ بلوچ و ملائیشیا نا وزارت خارجہ نا ڈپٹی سیکرٹری جنرل (ہڑتوم آ کنڈآتا امور) داتونارمن بن محمد ئسک کریر۔ فریق آک پاکستان ملائیشیا تعلقداری نا غٹ پلو آتا جاچ ءِ ہلکر و ہڑتوم آ کنڈآتا سٹریٹجک شریداری ءِ پین سوگو کننگ نا عزم ءِ پوسکن کریر۔ ترجمان نا رداٹ پاکستان وملائیشیا ہر کہو ل آرابطہ و گپ وتران ءِ مون آ دننگ، ساڑی آ ہڑتوم آ کنڈآتا میکانزم ءِ فعال و تعلقداری تے پین سوگو کننگ کن پوسکن آ بشخ آتیٹی کمکاری ءِ برجاتخرہ۔ بیان اٹی پاننگانے کہ ہڑتوم آ ملک آک تین پہ تینی واپار و زرکاری، دفاع و سلامتی، کشت وکشار و خور انا رکھ، توانائی، جان جوڑی، تعلیم و سائنس و ٹیکنالوجی تون اوار چندی بشخ آتیٹی کمکاری ٹی ودکی کیرہ۔ ملائیشیا ٹی ودکی پاکستانی افرادی قوت نا خذمت دوئی کننگ تون اوار پارلیمانی تبادلہ و الس نا نیام اٹ رابطہ غاتا است بڈی ءِ کننگک۔ بیان نا رداٹ ہڑتوم آ ملک آتا نیام اٹ علاقائی امن و سلامتی، اسلاموفوبیا و موسمیاتی بدلی تون اوار تین پہ تینی است خواہی نا چندی علاقائی و جہانی امور آ ہم گرنچی خننگا۔ فریق آک کثیر الجہتی پلیٹ فارم بشمول او آئی سی و اقوام متحدہ ٹی خڑکی کمکاری ٹی تینا است خواہی نا درشانی ءِ کریر۔ گپ وتران اٹی پاکستان آسیان تون تعلقداری ٹی ودکی نا است خواہی نا ہم درشانی ءِ کریر ہراڑان پورو مذاکراتی شریداری بناکیک۔ ایڈیشنل سیکرٹری خارجہ پاکستان اٹی نوکاپ آن زہمی تیکن است انا بھلنی و انسانی امداد آ ملائیشیا نا منت واری ءِ ہرفے۔
