اسلام آباد۔ 29 مارچ (اے پی پی) دفترخارجہ شنگھائی کمکار تنظیم نا مسخت آتیکن پاکستان نا عزم انا درشانی ءِ کرسا پارینے کہ پاکستان نا خارجہ پالیسی امن، سوگوی و اقتصادی شونداری آٹی ءِ۔ چارشنبے نادے آ ترجمان دفترخارجہ پارے کہ شنگھائی کمکار تنظیم (ایس سی او ) نا باسک ملک آتا سیکورٹی کونسل نا سیکرٹریز نا 18 می دیوان اٹی قومی سلامتی ڈویژن نا سیکرٹری انجینئر عامر حسن نا کماشی ٹی پاکستانی ڈل زوم لنک انا کمک اٹ بشخ ہلک۔ ترجمان پارے کہ دہشت گردی و انتہاپسندی نا لعنت آ ہیت کرسا عامر حسن دہشت گردی و انتہاپسندی نا برخلاف جنگ اٹی پاکستانی الس نا بے مٹ قربانی تے مون آ تخا۔ اوداہیت آ زور شاغا کہ پاکستان نا خارجہ پالیسی امن، سوگوی و اقتصادی شونداری آٹی ءِ۔ اوشنگھائی کمکار تنظیم نا مسخت آتیکن پاکستان نا عزم انا درشانی ءِ ہم کرے۔
