اسلام آباد۔ 28 مارچ (اے پی پی) صدر مملکت ڈاکٹر عارف علوی تاجکستان تون واپاری و اقتصادی تعلقداری تے ودفنگ آ زور شاغسا پارینے کہ ہڑتوم آ ایلم ملک آتا شونداری کن واپار و زرکاری ءِ ودفنگ کن گام گیج کننگے، پاکستان’’وژن نیامی ایشیا‘‘ پالیسی نا رداٹ غٹ نیامی ایشیائی ریاست آتون گچین، بھرمی و پائیدار رابطہ جوڑ کننگ خواہک، پاکستان نیامی ایشیاتون سیاسی، اقتصادی و توانائی نا بشخ آتیٹی رابطہ غاتے سوگو کننگ کن سنبرینگوک ءِ ، کاسا 1000 توانائی ڈٹ وژن نیامی ایشیانا اسہ اہم ءُ جزو اسے۔ ایوان صدرنا پریس ونگ انا رداٹ صدر مملکت ڈاکٹر عارف علوی تاجکستان کن پندار سفیر محمد سعید سرور تون گپ وتران کریکہ۔ صدر مملکت ڈاکٹر عارف علوی پارے کہ پاکستان نا تاجکستان تون تاریخی و دودوربیدگی رابطہءِ، تاجکستان اٹی پاکستان نا سفیر توانائی و واپاری تعلقداری تے ودفنگ کن کاریم کے، پندار سفیر تاجکستان اٹی پاکستان نا دروشم ءِ گچین کننگ کن کاریم کے۔ صدر ہڑتوم آ ملک آتا تعلیمی ادارہ غاتا نیام اٹ علمی رابطہ قائم کننگ نا گرج آ زور شاغسا پارے کہ تاجک طالب علم آک ورچوئل یونیورسٹی و علامہ اقبال اوپن یونیورسٹی نا تعلیمی مواد اسکان رسینگ دوئی کرسا فائدہ ہرفنگ کیرہ۔ صدر مملکت بھارت نا اقلیت دشمن و مسلمان دشمن پالیسی تے تالان کننگ نا گرج آ زور شاغسا پارے کہ بھارتی سیکورٹی فورس آتا کنڈآن بھارت نا غیرکانودی کوزہ ٹی جموں وکشمیر اٹی کروک آ ظلم ءِ ہم تالان کننگے۔ صدر مملکت محمد سعید سرور ءِ تاجکستان اٹی بطور پاکستان نا سفیر تعیناتی آ مبارکبادی تس۔ اوپارے کہ پندار سفیر ایلم ملک تاجکستان تون ہڑتوم آ کنڈآتا تعلقداری تے پین سوگو کننگ کن کاریم کے۔
