اسلام آباد۔ 27 مارچ (اے پی پی) وزیر مملکت خزانہ ڈاکٹر عائشہ غوث پاشا پارینے کہ ساڑی حکومت زرگزران ءِ سود آن پاک کننگ کن سنبرینگوک ءِ، دا چرجوئی ٹی ٹرانسفارمیشن پلان تیاری نا گڈیکو ریسہ ٹی ءِ۔ دوشنبے نادے آ قومی اسمبلی ٹی وقفہ سوج آتیٹی آسیہ عظیم نا سوج انا ورندی ٹی وزیر مملکت خزانہ ڈاکٹر عائشہ غوث پاشا پارے کہ ایف بی آر نا ریکارڈ نا رداٹ دا وخت آ ملک اٹی 3161 درملکی کمپنی ساڑی ءُ ہرافتے ٹی 2021اٹی 307 ارب و 2022اٹی 340 ارب روپئی نا زرکاری کننگا۔ ہیلتھ کارڈ انا کمک اٹ درمان کن مرکز و صوبہ نا کڑد ادا کریکہ۔ دانا بجٹ بھاز زیات وداسس نن اونا ری ڈیزائننگ ءِ کننگ اُن تانکہ بیرہ حقدار مخلوق ءِ درمان نا آسراتی ملنگ کے۔ اسہ پین ضمنی سوج اسے نا ورندی ٹی وزیر مملکت پارے کہ خراج آتیٹی استثنیٰ ٹرن اوور نا بنداو آ تننگک۔عالیہ کامران نا سوج انا ورندی ٹی ڈاکٹر عائشہ غوث پاشا پارے کہ حکومت سود آن پاک زرگزران کن سنبرینگوک ءِ۔ عدالت نا فیصلہ نا رداٹ پنچ سال آتیٹی ننے زرگزران ءِ سود آن پاک کروئی ءِ۔ دا بابت کمیٹی اس جوڑ کرسا ٹرانسفارمیشن پلان اس جوڑ کننگ انگ ءِ۔ مولانا عبدالاکبر چترالی نا سوج انا ورندی ٹی وزیر مملکت خزانہ پارے کہ دا کمیٹی ٹی سٹیٹ بینک، وزارت خزانہ ، عالم دین و ایلو واپاری بینک آتا نمائندہ غاک ءُ، نن زرگزران ءِ سود آن پاک کننگ کن پبی وڑاٹ مون آ ہِننگ اُن۔ اوپارے کہ سٹیٹ بینک شرح سود اٹی اقتصادی حالیت آتےمون آ تخسا ودفینے۔ دا باندات اٹی حکومت نا کڑد الوکہ۔
