کوئٹہ۔ 24 مارچ (اے پی پی) بلوچستان یونین آف جرنلسٹس شہید صحافی ارشاد مستوئی و شاہد زہری ءِ صدارتی ایوارڈ تننگ آ صدر مملکت و حکومت پاکستان نا منت واری ءِ ہرفسا پارینے کہ بلوچستان اٹی صحافت نا بشخ اٹی خذمت و جان تے ندر کروک آ شہید آتے ایوارڈ تننگ ستاکڑزوک ءُ گام اسے۔ بی یوجے نا صدر عرفان سعید، جنرل سیکرٹری منظور احمد و کابینہ ارشاد احمد مستوئی و شاہد زہری ءِ تمغہ امتیاز تننگ آ صدر مملکت، حکومت پاکستان و گورنر بلوچستان ملک عبدالولی کاکڑ نا منت واری ءِ ہرفسا پارینو کہ شہید صحافی ارشاد مستوئی و شاہد زہری نا غم ءِ گیرام کننگ مفک ولے اوفتا خذمت و قربانی تا ریاستی کہول آ امنائی صحافتی برادری و شہید صحافی تا خاہوت کن ستانا قابل ءِ۔ بی یوجے نا اسیجائی بیان اٹی بلوچستان حکومت آن خواست کننگاکہ شہید ارشاد مستوئی و شاہد زہری تون اوار غٹ شہید صحافی تا کیس آتیٹی پیش رفت نا بابت بی یوجے ءِمعلومدار کننگے۔ شہید صحافی تا خون اٹ اوار دوبہ دار آتے دزگیر کننگے۔ بیان اٹی داہم خواست کننگانے کہ بلوچستان حکومت شہید ارشاد مستوئی نا چناتے رہینگ کن اُرا و اونا جنوزان ءِ ملازمت تننگ نا تینا قول ءِ پورو کے۔
