کوئٹہ۔ 24 مارچ (اے پی پی) پاکستان پیپلزپارٹی زالبول ونگ بلوچستان نا صدر و مسکوہی صوبائی وزیر غزالہ گولہ پارینے کہ اسلام زالبول نا حق انا پورو رکھ ءِ کرینے زالبول آتا شونداری نا بابت نن تینا کڑد ءِ بیرہ دعویٰ و قول آتسکان محدود تخپن بلکن دا چرجوئی ٹی عملی گام گیج کننگے، ایم این سی ایچ پروگرام محکمہ جان جوڑی و یو این ایف پی اے نا منت وار اُن کہ اوفک صوبہ و خاص کر صحبت پور ضلع نا زالبول آتا است بڈی کن دا پروگرام ءِ اڈ تسر۔ داہیت ءِ او ایم این سی ایچ پروگرام محکمہ جان جوڑی و یو این ایف پی اے نا کنڈآن زالبول آتا جہانی دے انا رداٹ اڈ ہلوک آ دود آن تران کرسا پارے۔ پروگرام اٹی ضلعی ناظم جان جوڑی صحبت پور ڈاکٹر شوکت بلوچ، ضلعی ناظم تعلیمات زالبول زاہدہ پروین، اسسٹنٹ کمشنر صحبت پور افتخار احمد، ڈی ایس ایم پی پی ایچ آہی صحبت پور شاہجہان مینگل ، ڈپٹی ڈی ایچ او ڈاکٹر عبدالحئی تون اوار زالبول و ہیلتھ ورکرآک بھلو کچ اسے ٹی بشخ ہلکر دا وخت آ ضلع نا غٹ زالبول اسٹاف، زالبول منشاکارآتے خراج تحسین پیش کننگا۔ دود آن تران کرسا غزالہ گولہ و ایلو ترانکار آک پاریر کہ زالبول آک نوکاپ نا سخت انگا حالیت آتیٹی حوصلہ، لگن خواری اٹ سخت حالیت آتیٹی بیدس غرض انا زہمی و خاص کر زالبول و چناتا بے لوث خذمت ءِ کریر و دا مچ آ نوکاپی، ہلہلہ ئی حالیت آتیٹی غٹ آن زیات زہمی زالبول و چناک ئسر و ننے اوفتا دڑد ءِ پہہ مرسا و محسوس کرسا اوفتا دڑد آ مالم تخوئی مریک۔ اوفک پاریر کہ راج اٹی زالبول ءِ اخس نزور تکنگک ولے حقیقت اٹ زالبول اوکان کیہی زیات سوگو مسنے دادے ءِ اڈتننگ نا مسخت راج اٹی زالبول آتا حق انا بابت آگاہی نا اسہ کوشست اسے ہرافتا کمک اٹ جہانی برادری نا شونداری ٹی زالبول آتا کڑد انا اہمیت و فائدہ غاتے تالان و امنا کننگ ءِ۔ اوفک پاریر کہ زالبول آتا دا دے انا وخت آ نن قول کینہ کہ نن اودے اسہ دے اس اڈترسا است آن دپنہ ہر زالبول ءِ اونا روا ہند اس ترفنگ کن ہمہ وخت مصروف عمل مرینہ گرج داہیت انا ءِ کہ زالبول آتا شونداری نا بابت نن تینا کڑد ءِ بیرہ دعویٰ و قول آتسکان محدود تخپن بلکن دا چرجوئی ٹی عملی گام گیج کننگے داوڑ کرسا پک کننگے کہ زالبول آتا حالیت گچین مریک تو او راجی اومعاشرتی شونداری ٹی گچین و فعال کڑد ادا کننگ کیرہ دا حقیقت اسہ جہانی ءُ سچائی اسےنا وڑاٹ مون آ بسنے کہ ہمو راج گچین وڑاٹ شون ہلنگ کیک ہرافتے ٹی زالبول آتا اہمیت ءِ امنا کرسا اوفتے بریبر نا حق تننگانے۔ اوفک پاریر کہ ہر پڑاٹ جوہر نشان تسنو چائے او سیاست نا میدان مرے یا سائنس و ٹیکنالوجی نا ، گوازی نا پڑ مرے یا میڈیکل نا پیچیدہ ریسرچ مرے زالبول آک ہر میدان اٹ تینا اہمیت ءِ منفینو۔ اوفک پاریر کہ زالبول آک ننا آبادی نا نیمہ غان زیات بشخ ءُ اوکان پد ہم زالبول آتا حق ءِ تننگپک ملکی کہول آ زالبول آتا شونداری و شونہالی کن اخس کہ پڑو کننگک اوفتا نیمہ غا ہم عمل کننگپک چنانچہ دا جوانی اٹ محسوس کننگ مریک کہ اینو نا دا شون ہلوک دور اٹی ہم زالبول آتا راجی اہمیت کم ءِ اسلام زالبول ءِ تقدس تسنے اونا ہن و بر، بش وتول آن ہلیس اونا بیرفنگ اسکان ہرہر گڑا غا اسہ مقدس اس ترسا اودے تسنے اسلام زالبول نا حق انا پورو رکھ ءِ کرینے۔
