اسلام آباد۔ 20 مارچ (اے پی پی) صدر مملکت ڈاکٹر عارف علوی پارینے کہ باہ انا 95 درسد ناجوڑی تے توننگ مریک، اسلام اٹی طہارت یا سفائی ءِ نیمہ ایمان گوندنگانے، زر خڑچ کننگ آن بیدس دنان تا سفائی آن ملک آن باہ انا ناجوڑی تے چٹفنگ مریک۔ داخیال آتا درشانی ءِ او دوشنبے نادے آ باہ انا جان جوڑی نا جہانی دے انا وخت آ قوم انا پن تینا کلہو اٹی کرے۔ صدر مملکت پارے کہ 20 مارچ آ دنان و باہ انا ناجوڑی تا توننگ آ چکار کننگک، خواجہ صلی اللہ علیہ و آلہ وسلم باہ و دنان تا سفائی نا کثرت اٹ اہتمام ءِ کریکہ، اسلام اٹی طہارت یا سفائی ءِ نیمہ ایمان گوندنگانے، صحیح بخاری ٹی کم و ود 21 حدیث آتیٹی باہ انا سفائی و مزواک نا ذکر ءِ۔ ڈاکٹر عارف علوی مخلوق آ زور شاغا کہ او دے اٹی اِرا وار مزواک یا برش اٹ دنان تے جوان ساف کیر، داڑان ناجوڑی تیان مُر مننگ تون اوار اوار جان جوڑی ہم گچین مریک۔ صدر مملکت پارے کہ باہ انا ناجوڑی تا درمان مشکل و کبین مریک، زر خڑچ کننگ آن بیدس بیرہ دنان تا سفائی آن ملک آن باہ انا نوجوڑی تے چٹفنگ مریک۔اوپارے کہ سپاری و چھالیہ باہ انا کینسر نا سوب ءُ ہنداسوب آن مخلوق دافتیان پاناد کے۔
