اسلام آباد۔ 20 مارچ (اے پی پی) بنجائی وزیر تعلیم و کسبی تربیت رانا تنویر تون وائس چانسلر قائد اعظم یونیورسٹی ڈاکٹر نیاز احمد اختر اوڑدہی کرے۔ دوشنبے نادے آ وزارت تعلیم آن جاری بیان نا رداٹ اوڑدہی ٹی سیکرٹری بنجائی تعلیم و کسبی تربیت جناب وسیم اجمل چوہدری ساڑی ئسک۔ داوخت آ رانا تنویر پارے کہ قائد اعظم یونیورسٹی ءِ مون تروک چیلنج آتیا دمدستی چکار کننگ نا گرج ءِ۔ اوپارے کہ قائد اعظم یونیورسٹی اسہ باوقار ءُ یونیورسٹی اسے و طالب علم آتا آخبت اولیت ءِ۔ بنجائی وزیر پارے کہ احتساب آن بیدس اسہ ادارہ اس ہم شون ہلپک۔ اومون آ تخا کہ پورو احتساب گچین بست وبند اٹی اہم ءُ کڑد اس ادا کیک۔ اوپارے کہ ہر بندغ تینا واک و اختیار نا ہنداوڑ جوابدہ ءِ ہراوڑ او پاکستانی الس ءِ جوابدہ ءُ۔ اوداہیت ءِ پک کننگ نا عزم انا درشانی ءِ کرے کہ قائد اعظم یونیورسٹی نا غٹ ساڑی ویل آتے جنگی بنداو تیا ایسر کننگے۔ اوڈاکٹر نیاز ءِ اونا بھلا اومیت آتے تالان کرسا پورو کمکاری نا باوری کرفے۔ قائد اعظم یونیورسٹی نا وائس چانسلر ڈاکٹر نیاز احمد اختر وزیر نا کنڈآن اوڑا کروک آ پت انا ستاءِ کرے۔ اوپارے کہ او دا عہدہ ءِ اسہ امانت اس تکک و تینا زمواری تے پورو ایمانداری اتون پورو کیک۔ ڈاکٹر نیاز پارے کہ قائد اعظم یونیورسٹی اسہ باوقار ءُ یونیورسٹی اسے و اونا بھلو تاریخ اسے۔ ایسر اٹ ڈاکٹر نیاز وزیر ءِ باوری کرفے کہ او پورو خواری اتون تینا فرض ءِ سرایتک۔
