یونیورسٹی آف تربت اٹی بلوچستان اٹی چیلنج و مون آ ہِننگ نا گمان آتا سرحال آ پینل ڈسکشن

کوئٹہ۔ 20 مارچ (اے پی پی) یونیورسٹی آف تربت اٹی شعبہ پولیٹیکل سائنس نا کنڈآن بلوچستان اٹی مفاہمتی عمل، چیلنج و مون آ ہِننگ نا گمان تا سرحال آ پینل ڈسکشن اس اڈتننگا۔ ہرانا مسخت بلوچستان نا متکن آ ویل و چیلنج آتا ایسری نا عمل اٹ تعلیم نا چاہندار و ورناتا سلاہ تے اوار کننگ ءِ۔ پروگرام اٹی قائد اعظم یونیورسٹی اسلام آباد نا مسکوہی ڈین سوشل سائنسز و ڈائریکٹر اسکول آف پولیٹیکس اینڈ آئی ٹی پروفیسر ڈاکٹر نذیر حسین، اسلام آباد انسٹی ٹیوٹ آف کنفلیکٹ ریزولوشن نا بانی و ایگزیکٹیو ڈائریکٹر صبا اسلم و جامعہ تربت نا فیکلٹی آف لیگل ایجوکیشن نا ڈین پروفیسر ڈاکٹر گل حسن بطور پینلسٹ بشخ ہلکر وخت اس کہ پروگرام نا نظامت جامعہ تربت نا ڈائریکٹر اسٹوڈنٹ افیئرز مظفرحسین کرے۔ چاہندار آک داہیت آ زور شاغار کہ بلوچستان نا ویل بلوچستان نا الس و حقی سرکڑدہ غاتون رابطہ کرسا گپ وتران نا کمک اٹ ہی ایسر مننگ کیرہ۔ اوپاکستان نا چندی قوم تا نیام اٹ سیوت، رواداری ، اخلاقی قدر و اختلاف رائے ءِ قبول کننگ نا گرج آ زور شاغا۔ داوخت آ مفاہمتی عمل اٹ ورنا، تعلیم نا چاہندار، صوبائی و بنجائی حکومت، سیاست دان، سول سوسائٹی و میڈیا نا کڑد آ ہم شرہ کننگا۔ بشخ ہلوک آک پاریر کہ حکومتی و راجی کہول آ پت انا کمتی مفاہمتی عمل اٹ اسہ بھلو اڑاند اسے و بلوچستان اٹی ویل آتا ایسر کننگ کن پت سازی کن دمدستی گام گیج آتا گرج ءِ ۔ اوداہیت آ زور شاغا کہ صوبہ ٹی پائیدار امن و شونداری کن الس نا روا سیاسی و زرگزرانی حق ءِ ایول اکائی تا بریبر اتنگ بھاز اہمیت تخک۔ پروگرام نا مہمان خاص بلوچستان نا مسکوہی وزیر و سیاست دان میر اصغر رند بلوچستان نا چندی ویل و اوفتا گمانی ایسری ءِ مون آ تخا۔ یونیورسٹی آف تربت نا پرووائس چانسلر ڈاکٹر منصور احمد جامعہ تربت نا وائس چانسلر نا کنڈآن بلوچستان اٹی مفاہمتی عمل آ اڈ ہلوک علمی شرہ ٹی بشخ ہلنگ آ مہمان و ایلو بشخ ہلوک آتا منت واری ءِ ہرفے۔ جامعہ تربت نا فیکلٹی آف سوشل سائنسز نا ڈین پروفیسر ڈاکٹر عبدالصبور بلوچ بلوچستان اٹی مفاہمتی عمل ءِ سرسہب کننگ کن سلاہ تس۔ پروگرام اٹی فیکلٹی باسک ، انتظامی عملہ، علاقائی متبر، سول سوسائٹی، بزنس کمیونٹی و طالب علم آک بھلو کچ اسے ٹی بشخ ہلکر۔