ننا سیکورٹی فورس آتا ورناتا قابل رشک کڑد مچ آ قوم انا مون آٹی ئِ
وزیر داخلہ نا سیکورٹی فورس و ایف سی نا شہید آتا قربانی تے خراج عقیدت
وارسک۔ 20مئی (اے پی پی) وزیر داخلہ چوہدری نثارعلی خان پارینے کہ ننا سیکورٹی فورس آتا ورناتا قابل رشک کڑد مچ آ قوم انا مون آٹی ئِ وارسک اٹی فرنٹیئر کور (ایف سی) نا 1256می کورس انا پوروی آ ہفتہ نا دے پاسنگ آﺅٹ پریڈ نا وخت آ مہمانِ خصوصی نا وڑاٹ تران کرسا وزیر داخلہ چوہدری نثارعلی خان پارے کہ ننا سیکورٹی فورس آتا ورناتا قابل رشک کڑد مچ آ قوم انا مون آٹی ئِ ۔ پاسنگ آﺅٹ پریڈ اٹی تینا تربیت ئِ پورو کروک آ ایف سی نا ہشت سد ریکروٹس ساڑی ئسر۔ داوخت آ وزیر داخلہ پاس آﺅٹ مروک آ ریکروٹس، اوفتا لمہ و باوہ و استاد آتے سرسہبی اٹ تربیت پورو کننگ آ مبارکبادی تس۔ اوپارے کہ اینو نما کسبی زند انا بنائِ ولے زند و کسب نا بھاز انگا امتحانک نمامون آٹی ئُ۔ اوفورس انا ورناتیا زورشاغا کہ نم زند انا ہر امتحان ، آزمائش و مشکل اٹی اسہ ایلو تون زیات آن زیات سرسہبی دوئی کروئی ئِ و قومی خذمت نا اسہ بڑزکو معیار اس قائم کروئی ئِ۔ وزیر داخلہ پارے کہ اینو نا دے نم غٹ تینا زند اٹی اولیکو گام ئِ ہرفنگ اورے و نم ہرا فورس انا باقاعدہ بشخ جوڑ مننگ اورے و ہرا ورندی ئِ بیننگ اورے دابابت نما زمواری ئِ کہ دا وردی و فورس انا مان ئِ تخبو ، اونا عزت و وقار اٹی ودکی کبو۔ وزیر داخلہ پارے کہ ایف سی نا تاریخ سد سال آن ہم متکن ئِ و دا ایہون ئُ سیکورٹی فورس اس اف بلکن دانا مریس تاریخ اٹی سد و ہزار آ ورناتا دتر اوارئِ۔ اوپارے کہ نمے بڑزکو معیار ئِ قائم تخسا غازی و شہید آتا روایت آتے برقرار تخسا پین بڑزکو معیار قائم کروئی مریک ہراڑآ نن غٹ فخر کننگ کین۔ اوپارے کہ نم بیرہ ایف سی نا سپاہی افیرے بلکن اسلام و پاکستان نا محافظ ہم اریرے۔ و نمے ملک آن شرو پھسات ئِ چٹفوئی ئِ۔ اوورناتے تون پارے کہ نم ہمو ملک انا محافظ اورے ہرا اللہ و اونا رسولؑ نا پن اٹ دوئی کننگانے و دا اسٹ انگا ملک ئِ ہرا اسلام نا پن آ وجود اٹی بسنے۔ دانا دفاع ننا غٹ انا قومی زمواری ئِ۔ وزیر داخلہ پارے کہ گدرینگوک آ منہ سال اٹی گڑاس خلقت ملک اٹی پھسات و شربرپا کرینو و نمے تینا دوتا زور اٹ اوفتا پورو قلع قمع ئِ کروئی ئِ۔ اوپارے کہ پاکستان نا ہر سپاہی اسلام نا سپاہی ئِ و داہیت ہروخت بایدے نما دماغ اٹی مرے کہ پھسات اللہ تعالیٰ ئِ بھاز ناپسند ئِ و ہرا خلقت اللہ نا دھرتی آ پھسات تالان کیرہ اللہ اوفتے سخت ناپسند کیک۔ وزیر داخلہ پارے کہ ای بطور وزیر و حکومت نا نمائندہ نا وڑاٹ داہیت ئِ صفا کننگ خواوہ کہ حکومت غٹ تر مشکل آتا باوجود آخبت نا پیش بندی کن ہر گام ئِ چست کننگ ئِ ہرا ننا سیکورٹی فورس آتا گرج ئِ۔ اوپارے کہ گدرینگوک آ مسہ نیم سال اٹی وزیراعظم محمد نواز شریف سول آرمڈ فورس آتا بجٹ اٹی 80 ارب روپئی نا ودکی کرینے، اوپارے کہ گدرینگوک آ شش تُو اٹی 14ہزارورناتا تربیت پورو مسنے وخت اس کہ بروک آ اِرا مسہ تُو اٹی ایف سی نا 29 ونگز پورو کننگرہ۔ اوپارے کہ حکومت تینا زمواری تیان جوان وڑاٹ معلومدار ئِ۔ نمے اسہ کنڈدہشت گردی نا جنگ اٹی تینا کڑد ئِ ادا کروئی ئِ داکان بیدس تینا ملک و اونا سیم انا رکھ ئِ ہم کروئی ئِ۔ اوپارے کہ حکومت فیصلہ کرینے کہ ملک اٹی دہشت گردی نا پترینگ انگ ئِ توننگ کن سیم آ باڑ خلنگک و نن غٹ اواری اٹ ملک ئِ دہشت گردی آن پاک کینہ۔ وزیر داخلہ پارے کہ ننا سیوت و اتفاق ہنداوڑ برجاسلیس تو نن تینا مزل اسکان سرسہبی اٹ سرمرینہ۔ تینا تران نا ایسر اٹی اوایف سی اوار مروک آ کارندہ غاتا آخبت اٹی سرسہبی کن دعا کرے و پارے کہ اللہ تعالیٰ نمے نیک مسخت اٹی پین سرسہبی ایتے۔
