اسٹیٹ بینک برآمد کروک آتے آسراتی فراوان کننگ کن وڑوڈول ءِ آسان کے، بنجائی وزیر واپار سید نوید قمر

اسلام آباد۔ 17 مارچ (اے پی پی) بنجائی وزیر واپار سید نوید قمر پارینے کہ اسٹیٹ بینک برآمد کروک آتے آسراتی فراوان کننگ کن وڑوڈول ءِ آسان کے، برآمد کروک آتے زیات آن زیات فائدہ تننگ کن ایکسپورٹ فیسیلی ٹیشن اسکیم ءِ گچین کاریم اٹ اتنگے، بی ٹو بی بارٹراسکیم صنعتی گڑاتا درآمد اٹی آسراتی فراوان کیک۔ وزارت آن جاری بیان نا رداٹ داخیال آتا درشانی ءِ او تینا کماشی ٹی کمیٹی ایکسپورٹ ءِ ودفنگ نا ارٹ میکو دیوان اٹی گپ وتران کرسا کرے۔ دیوان اٹی بنجائی وزیر پوریاگر برادری ءِ اوفتا ویل آتا ایسراٹی حکومت پاکستان نا پورو کمکاری نا باوری کرفے۔ اوپارے کہ وزارت واپار برآمد کروک آتے مون تروک لیکویڈیٹی نا ویل آتیان پورو وڑاٹ معلومدار اُٹ و او ذاتی وڑاٹ اسٹیٹ بینک آف پاکستان، فیڈرل بورڈ آف ریونیو و وزارت خزانہ تون باندات ءِ ہرفینٹ تانکہ برآمد کروک آتے اوفتا لیکویڈیٹی نا گرج آتے پورو کننگ اٹ آسراتی فراوان کننگ مرے۔ اوپارےکہ کم خڑچ انا فنانسنگ و برآمد کروک آتا ڈیوٹی ڈرابیک و سیلز خراج نا واپسی ءِ ترند کننگے۔ بنجائی وزیر برآمد کروک و اوفتے تون منسلک صنعت ءِ کریڈٹ نا چٹھی تے ملنگ اٹ مون تروک مشکل آتا ہم نوٹس ءِ ہلک و خاص وڑاٹ داہیت آ زور شاغا کہ برآمد کروک آتے اوفتا خام مال، سپیئرپارٹ و لوازمہ غاتا درآمد کن ایل سیز ملسا اوفتا اولیت ءِ حقی وڑاٹ پک کننگے۔ ایکسپورٹر آتا باندات ءِ ہرفسا وزیر اسٹیٹ بینک ءِ پارے کہ او برآمد کروک آتے آسراتی فراوان کننگ کن وڑوڈول ءِ آسان کے۔ اوپارے کہ وزارت واپار اسہ بی ٹو بی بار ٹر اسکیم اس جوڑ کرینے ہرا صنعتی گڑاتا درآمد اٹی آسراتی فراوان کیک و وام تا بنائی چٹھی و زرمبادلہ نا دستیابی ٹی مون تروک اڑاند آتے مرکیک۔