اسٹیٹ بینک پارلیمنٹ نا سینیٹ نا گولڈن جوبلی نا وخت آ 50روپئی نا یات گاری سکہ اس جاری کیک

اسلام آباد۔ 17مارچ (اے پی پی) اسٹیٹ بینک پارلیمنٹ نا سینیٹ نا گولڈن جوبلی نا وخت آ 50 روپئی نا یات گاری سکہ اس جاری کیک۔ اسٹیٹ بینک نا کنڈآن جاری اعلامیہ نا رداٹ سینیٹ آف پاکستان ہراکہ آئینی وڑاٹ ہائوس آف فیڈریشن ءِ، پاکستان نا اِرا ایوان تیا تالان پارلیمنٹ نا کانود سازی نا بڑزکو چیمبر ءِ نا ٹہیفنگ نا 50 سال پورو مننگ آ 50روپئی نا یات گاری سکہ اس جاری کننگک۔ اعلامیہ ٹی پاننگانے کہ سینیٹ آف پاکستان اٹی پاکستان نا غٹ صوبہ غاتے بریبر نمائندگی تننگانے، دااسہ آخبتی ءُ ایوان اسے ہرا قومی امور نا پروسیس نا چرجوئی نا نشانی ءِ۔ سال 2023ء پاکستان نا سینیٹ نا گولڈن جوبلی نا سال ءِ۔ دا خصوصی وخت انا رداٹ بنجائی حکومت سٹیٹ بینک ءِ 50 روپئی نا یات گاری سکہ اس جاری کننگ نا موکل تسنے۔ دا یات گاری سکہ ءِ 17 مارچ 2023ء آن ایس بی پی بینکنگ سروسز کارپوریشن نا فیلڈ دفتر آتا غٹ تبادلہ نا کائونٹر آتیان جاری کننگک۔ 50 روپئی نا یات گاری سکہ نا دروشم گول ءِ ہرادے 30.0ملی میٹر سمت اتون نقش کننگانے، دانا وزن 13.5گرام و دا پتل و نکل نا دھاتی اجزا(تانبا 75 درسد ونکل 25 درسد ) آ تالان ءِ۔ سکہ نا مون نا رخ نا نیام اٹ ودوک آ ہلالی نوک و پنچ نوک آتیا تالان ستارہ اس تننگانے ہرانا رخ قطب دیکی نا کنڈآٹے۔ سکہ نا دائرہ تون نوک استار نا زی آ”اسلامی جمہوریہ پاکستان ” نا لوز  اردو سکرپٹ اٹ نوشتہ کننگانے۔ نوک انا کیرغ و خولم نا بڑزا مروک آ اِرا شاخ آتا زی آ سکہ نا جاری کننگ نا سال 2023 نوشتہ ءِ۔ سکہ نا ظاہری مالیت ’50’ مون آ بروک اعداد اٹی و ‘روپیہ’ اردو سکرپٹ اٹی بالترتیب نوک استار نا دامون و ایمون کنڈا نوشتہ کننگانے۔ دا امتیازی نشان نا زی آ دائرہ تون اردو سکرپٹ اٹی "پاکستان سینیٹ گولڈن جوبلی” نا لوز نوشتہ ءِ۔ سینیٹ نا امتیازی نشان نا کیرغ آن  گولڈن جوبلی نا مد (2023-1973) نوشتہ ءِ۔